2018ஆம் ஆண்டிற்கான உலகக்கோப்பையில் ஆஸ்திரேலியா – டென்மார்க் இடையிலான ஆட்டம் 1-1 என டிராவில் முடிந்தது.
‘சி’ பிரிவில் இடம்பிடித்துள்ள ஆஸ்திரேலியா – டென்மார்க் அணிகள் பலப்பரீட்சை நடத்தின.
ஆட்டம் தொடங்கிய 7-வது நிமிடத்தில் ஆஸ்திரேலியாவிற்கு அதிர்ச்சி காத்திருந்தது. டென்மார்க் அணியின் எரிக்சன் கோல் அடித்து அசத்தினார். இதனால் தொடக்கத்திலேயே டென்மார்க் 1-0 என முன்னிலைப் பெற்றது.
ஆட்டத்தின் 38-வது நிமிடத்தில் ஆஸ்திரேலியா வீரர் லெக்கி ரோஸ் தலையால் அடித்த பந்தை டென்மார்க் வீரர் யூசுப் பவுல்சன் தடுக்க முயன்றபோது பந்து கையில் பட்டது. நடுவர் VAR உதவியுடன் பெனால்டி வாய்ப்பு கொடுத்தார்.
இதை பயன்படுத்தி 38-வது நிமிடத்தில் ஜெடினாக் கோல் அடித்தார். இதனால் ஸ்கோர் 1-1 என சமநிலை அடைந்தது. அதன்பின் இரு அணி வீரர்களும் கோல் அடிக்காததால் ஆட்டம் 1-1 என டிராவில் முடிந்தது.
