யாழில் வாள்களுடன் முகமூடிக் கொள்ளையர்கள் அட்டகாசம்!

வாள்களுடன் நுழைந்த முகமூடிக் கொள்ளையர்கள் யாழ்ப்பாணம், மீசாலை புத்தூர்ச்சந்தி கமநலசேவைகள் திணைக்களத்திற்கு பின்புறமாக உள்ள ஆசிரியர் ஒருவரின் வீட்டிற்குள் பெரும் திருட்டை புரிந்துள்ளனர்.

வாள்களுடன் முகத்தை துணியினால் முற்றாக மூடியவாறு இன்று அதிகாலை 12.00 மணியளவில் மதில் பாய்ந்து வீட்டிற்குள் நுழைந்த சுமார் பத்து பேர் அடங்கிய குழு, வாள்களை காட்டி அச்சுறுத்தி தாலிக்கொடி உட்பட சுமார் 18 பவுண் நகைகள், 4000 ரூபா ரொக்கப்பணம் என்பவற்றையும் கொள்ளையிட்டு சென்றுள்ளனர்.

மேலும் சுமார் ஒரு மணி நேரம் வரை குறித்த வீட்டில் நின்ற கொள்ளையர்கள் கூக்குரல் கேட்டு வந்த அயலவர்களையும் அச்சுறுத்தியுள்ளனர்.

இக்கொள்ளை தொடர்பாக கொடிகாமம் பொலிஸாருக்கு அறிவித்ததை தொடர்ந்து ஒரு மணி நேரத்திற்குப் பின் சம்பவ இடத்திற்கு சென்ற பொலிஸார் விசாரணைகளை முன்னெடுத்துள்ளனர்.