யாழ் ஊரெழு பகுதியில் குடும்பப் பெண்ணை அடித்துக்கொலை. மூவர் கைது.

ஊரெழு பகுதியில் குடும்பப் பெண்ணை அடித்துக்கொலை செய்த குற்றச்சாட்டில் மூன்று பேர் இன்று அதிகாலை கைது செய்யப்பட்டனர் என்ற கோப்பாய் பொலிஸார் தெரிவித்தனர்.

குடும்பப் பெண்ணின் மகன் வழங்கிய தகவல்களின் அடிப்படையில் 3 பேர் கைது செய்யப்பட்ட நிலையில் மேலும் மூவர் விரைவில் கைது செய்யப்படுவர் என்றும் பொலிஸார் கூறினர்.

கோப்பாய் பொலிஸ் பிரிவுக்குட்பட்ட ஊரெழு மேற்கு சரஸ்வதி சனசமூக நிலைய பகுதியில் நேற்று ஞாயிற்றுக்கிழமை இரவு 8 மணியளவில் குடும்பப்பெண் ஒருவர் கொடூரமாக அடித்துக் கொலை செய்யப்பட்டார்.

வீட்டுக்குள் புகுந்த 6 பேர் கொண்ட கும்பல் ஒன்று இந்தக் கொலையைச் செய்தது என்று பொலிஸார் தெரிவித்தனர்.

சம்பவத்தில் சந்திரராசா விஜயகுமாரி (வயது-58) என்ற குடும்பப் பெண்ணே கொலை செய்யப்பட்டார். அவரது மகன் காயமடைந்தார்.