மிசிசாகா புல்வெளி கிராமம், டெர்ரி வீதி மற்றும் மெக்லாப்லின் வீதிப் பகுதியில் ஞாயிற்றுக்கிழமை இரவு இடம்பெற்ற துப்பாக்கிச் சூட்டுச் சம்பவம் ஒன்றின் தொடர்பில் மூவரை பொலிஸார் கைது செய்துள்ளனர்.
குறித்த இந்த சம்பவத்தில் 22 வயது ஆண் ஒருவர் துப்பாக்கிச் சூட்டுக்கு இலக்காகி படுகாயமடைந்ததாக பொலிஸார் தெரிவித்தனர்.
எனினும் துப்பாக்கிச் சூட்டுக் காயங்களுக்கு ஆளான அந்த ஆண் சம்பவ இடத்தில் காணப்படவில்லை என்ற போதிலும், சம்பவம் இடம்பெற்று சிறிது நேரத்தின் பின்னர் இரவு 8.05 அளவில் மேவிஸ் வீதிப் பகுதியில் காணப்பட்டதாகவும் பொலிஸார் தெரிவித்துள்ளனர்.
மிகவும் பாரதூரமான காயங்களுடன் காணப்பட்ட அவர் உடனடியாகவே வைத்தியசாலையில் அனுமதிக்கப்பட்டுள்ளதனையும், சிகிச்சைகளின் பின்னர் அவரது உடல்நிலையில் முன்னேற்றம் ஏற்பட்டுள்ளதனையும் பீல் பிராந்திய அவசர மருத்துவப் பிரிவினர் உறுதிப்படுத்தியுள்ளனர்.
இதேவேளை இந்தச் சம்பவம் தொடர்பில் மூன்று சந்தேக நபர்கள் குறித்த விபரங்களையும் வெளியிட்டிருந்த பொலிஸார், அந்த மூவரும் கைது செய்யப்பட்டதான தகவலை திங்கட்கிழமை காலை வெளியிட்டுள்ளனர்.
