மட்டக்களப்பு – கல்லடி பகுதியில் மரண வீடொன்றில் இரவு ஏற்பட்ட மோதல் காரணமாக ஒருவர் படுகாயமடைந்துள்ளதுடன், முச்சக்கரவண்டியொன்றும் எரிக்கப்பட்டுள்ளது.
இரவு 8.30 மணியளவில் மட்டக்களப்பு – கல்லடியில் உள்ள பொலிஸ் பயிற்சி கல்லூரிக்கு அருகிலேயே இந்த சம்பவம் இடம்பெற்றுள்ளது.
மரண வீட்டில் சூதாட்டத்தில் ஈடுபட்ட குழுவொன்றுக்கும், நபரொருவருக்கும் இடையில் ஏற்பட்ட வாய் தர்க்கத்தின் போது நபரொருவர் மீது 10 இற்கும் மேற்பட்டவர்கள் தாக்குதல் நடத்தியுள்ளனர்.
அதனை தொடர்ந்து குறித்த நபரின் முச்சக்கரவண்டியும் வீதியில் போட்டு தீ வைக்கப்பட்டுள்ளது.
தாக்குதலுக்குள்ளானவர் படுகாயமடைந்த நிலையில் மட்டக்களப்பு போதனா வைத்தியசாலையில் அனுமதிக்கப்பட்டு உள்ளதாகவும் தாக்குதல் நடத்தியவர்களில் இருவர் கைது செய்யப்பட்டு உள்ளதாகவும் காத்தான்குடி பொலிஸார் தெரிவித்துள்ளனர்.
இதேநேரம் அப்பகுதிக்கு சென்ற மட்டக்களப்பு குற்றத்தடவியல் பிரிவு பொறுப்பதிகாரி கே.ரவிச்சந்திரன் தலைமையிலான பொலிஸ் குழுவினர் இது தொடர்பான விசாரணைகளை மேற்கொண்டுள்ளனர்.
