கனடாவுக்கும் அமெரிக்காவுக்கும் இடையேயான எல்லைப் பகுதியில், பதிவு செய்யப்படாத வாகனத்தில் இருந்து 12 துப்பாக்கிகள் பொலிஸாரால் கைப்பற்றப்பட்டுள்ளன.
இந்நிலையில் குறித்த துப்பாக்கிகளை எடுத்துச் சென்ற ஃபுளோரிடாவைச் சேர்ந்த கெவின் க்ளென் நோரிஸ் என்ற 41 வயது ஆண் ஒருவரை அதிகாரிகள் கைது செய்துள்ளனர்.
சாஸ்கச்சுவானின் வடபகுதி எல்லைச் சாவடியில் வைத்து கடந்த ஞாயிற்றுக்கிழமை வாகனம் ஒன்றில் துப்பாக்கிகளுடன் எல்லையைக் கடக்க முயன்ற போது இவரைக் கைது செய்துள்ளதாக கனேடிய எல்லைப் பாதுகாப்பு பிரிவினர் தெரிவித்துள்ளனர்.
இந்நிலையில் குறித்த நபர் மீது கடத்தல், பொய்யான தகவல்களை வழங்கியமை, சட்டவிரோதமாக எடுத்துவரப்பட்ட பொருட்களை தெரியப்படுத்த தவறியமை உள்ளிட்ட குற்றச்சாட்டுகளை அவர் மீது பதிவு செய்துள்ளனர்.
இதன் போது 12 துப்பாக்கிகளுடன், சாதாரண அளவினை விடவும் அதிகளவு ரவைகளை நிரப்பக்கூடிய ரவைக் கூடுகள், தடை செய்யப்பட்ட மாதிரித் துப்பாக்கிகள் உள்ளிட்ட பொருட்களையும் அந்த வாகனத்தினுள் இருந்து அதிகாரிகள் கைப்பற்றியுள்ளனர்.
