மிசிசாகாவில் இடம்பெற்ற வாகன விபத்தில் 44 வயதுடைய பெண் ஒருவர் உயிரிழந்துள்ளார் என பொலிஸார் தெரிவித்துள்ளனர்.
மூன்று வாகனங்கள் மோதிக்கொண்ட இந்த விபத்து, டன்டாஸ் ஸ்ட்ரீட் வெஸ்ட் மற்றும் லிருமா வீதிப் பகுதியில் இடம்பெற்றுள்ளது.
தகவல் அறிந்து தாம் சம்பவ இடத்தினைச் சென்றடைந்த போது உயிரிழந்த பெண் உயிராபத்தான நிலையில் காணப்பட்டதாகவும், சம்பவ இடத்திலேயே அவருக்கு முதலுதவிகள் வழங்கப்பட்டு உடனடியாகவே அவர் வைத்தியசாலையில் அனுமதிக்கப்பட்டபோதும் சிறிது நேரத்தில் அவர் உயிரிழந்துவிட்டதாக அவசர மருத்துவப் பிரிவினர் தெரிவித்துள்ளனர்.
இதேவேளை இந்த விபத்துடன் தொடர்புடைய பிறிதொரு வாகனத்தில் இருந்த பெண் ஒருவரும் காயமடைந்துள்ள நிலையில், அவரும் வைத்தியசாலையில் அனுமதிக்கப்பட்டுள்ளார்.
விபத்தினை அடுத்து சம்பவ இடத்தின் ஊடான போக்குவரத்துகளைத் தடை செய்த அதிகாரிகள், மேலதிக விசாரணைகளை முன்னெடுத்து வருகின்றனர்.
