தாய்லாந்தில் அருவியில் விழுந்து 6 யானைகள் இறந்த சம்பவம் ஒன்று இடம்பெற்றுள்ளது.
தாய்லாந்தில் காவோ யாய் தேசிய பூங்காவிற்குள் ஹயூ நரோக் என்ற அருவி உள்ளது.
நேற்று முன்தினம் காலை இந்த அருவியின் அருகே யானை கூட்டம் உலாவிக்கொண்டிருந்த போது 3 வயதான குட்டியானை அருவியில் இருந்து தவறி விழுந்தது.
இதையடுத்து, குட்டியானையை காப்பாற்றும் முயற்சியில் அடுத்தடுத்து 5 யானைகள் அருவியில் இருந்து விழுந்தன.
இதற்கிடையே யானைகள் பிளிறும் சத்தம் கேட்டு பூங்கா ஊழியர்கள் அருவியின் கீழே சென்று பார்த்தபோது குட்டியானை உள்பட மொத்தம் 6 யானைகள் பாறைகளில் மோதி செத்து கிடந்ததை கண்டு அவர்கள் அதிர்ச்சி அடைந்தனர்.
இதையடுத்து, அருவிக்கு அருகே தவித்துக்கொண்டிருந்த 2 யானைகளை ஊழியர்கள் பத்திரமாக மீட்டனர். இந்த யானைகள் மனரீதியாக பாதிக்கப்பட்டு இருப்பதாகவும், அவற்றுக்கு சிகிச்சை அளிக்கப்பட்டு வருவதாகவும் பூங்கா அதிகாரிகள் தெரிவித்தனர்.
இதற்கு முன் கடந்த 1992-ம் ஆண்டு இதே அருவியில் விழுந்து 8 யானைகள் பலியான சம்பவம் தாய்லாந்தில் தேசிய அளவில் கவனத்தை ஈர்த்தது நினைவுகூரத்தக்கது.
