நீங்கள் வாக்களிக்கவுள்ள பிரதான வேட்பாளர்களின் பயோடேட்டா இதுதான்.
சஜித் பிரேமதாச
பிரித்தானியாவின்மில் ஹில் கல்லூரியில் க.பொ.த சா/த மற்றும் உயர்தர பரீட்சைக்கு தோற்றுவதற்கு முன்னதாக கொழும்பு சென்.தோமஸ் கல்லூரி, மற்றும் ரோயல் கல்லூரிகளில் கல்வி கற்றார். அங்கு உயர்தர பரிசும் வென்றார். 1986 ஆம் ஆண்டில் மில் ஹில்லில் நடந்த முதல் லெவன் கிரிக்கெட் அணியிலும் விளையாடினார்.
அவர் லண்டன் ஸ்கூல் ஒஃப் எக்னோமிக்ஸ் (எல்எஸ்இ) மற்றும் லண்டன் பல்கலைக்கழகத்தில் படித்தார். பொருளாதாரம், அரசியல் மற்றும் சர்வதேச உறவுகளை உள்ளடக்கிய பாடநெறியில் பட்டம் பெற்றார். பின்னர் அவர் மேரிலாந்து பல்கலைக்கழகத்தில் படிப்பதற்காக அமெரிக்காவிற்குச் சென்று அமெரிக்க செனட்டில் இன்டர்ன்ஷிப்பை முடித்தார். அங்கு ஜான் கெர்ரி உட்பட பல பிரபல அமெரிக்க அரசியல்வாதிகளை சந்தித்தார்.
இந்த காலகட்டத்தில்தான் அவரது தந்தை, முன்னாள் ஜனாதிபதி ரணசிங்க பிரேமதாச கொழும்பில் படுகொலை செய்யப்பட்டார் (மே 1, 1993). அப்போது இளம் சஜித்தின் வயது 26. தந்தையின் மரணத்தை தொடர்ந்து இலங்கை திரும்பி தாய் ஹேமா பிரேமதாச மற்றும் சகோதரி துலஞ்சலியுடன் துணையாக இருந்தார்.
1994ம் ஆண்டு, அவர் அரசியலுக்குள் நுழைய கொழும்பிலிருந்து தொலைதூரத்திலுள்ள, மஹிந்த ராஜபக்சவின் கோட்டையான ஹம்பாந்தோட்டை மாவட்டத்தில் கட்சிப்பணியாற்ற நியமிக்கப்பட்டார். பிரேமதாசவின் கோட்டை மத்திய கொழும்பு என்பது குறிப்பிடத்தக்கது.
சஜித் பிரேமதாச 2000 ஆம் ஆண்டில் பாராளுமன்றத்தில் நுழைந்தார். அந்த ஆண்டில் ஹம்பாந்தோட்டவில் அதிக விருப்பு வாக்கு, முழு நாட்டிலும் அதிக விருப்பு வாக்கு பெற்றார்.
2001ம் ஆண்டு சுகாதார பிரதியமைச்சராக நியமிக்கப்பட்டார். பின்னர் வீடமைப்பு, கட்டுமான அமைச்சராக நியமிக்கப்பட்டார். அப்போது, ஹம்பாந்தோட்டவில், ஜன சுவய, தருணா சவிய மற்றும் சசுனாட்ட அரன போன்ற பல மக்கள் சார்ந்த திட்டங்களைத் தொடங்கினார்.
2011 ல் ஐதேகவின் துணைத் தலைவராக சஜித் நியமிக்கப்பட்டார். 2015 பொதுத் தேர்தலுக்குப் பிறகு, சஜித் வீடமைப்பு நிர்மாணத்துறை அமைச்சராக நியமிக்கப்பட்டு, 2025 க்குள் அனைவருக்கும் தங்குமிடம் அடைவதை நோக்கமாகக் கொண்டு தனது தந்தையால் தொடங்கப்பட்ட காம் உதவ வீட்டுத்திட்டத்தை மீள ஆரம்பித்தார்.
இந்த ஆண்டு ஜனாதிபதி தேர்தலில் யார் போட்டியிடுவதென்ற போட்டி ஐ.தேகவிற்குள் மும்முனையில் ஏற்பட்ட போதிலும், செப்டம்பர் 26, 2019 அன்று, கட்சியின் செயற்குழு ஏகமனதாக சஜித் பிரேமதாசாவை தங்கள் வேட்பாளராக முடிவு செய்தது. அவர்கள் அன்னம் சின்னத்தின் கீழ் போட்டியிடுவார்கள்.
14 ஆண்டுகளில் பின்னர் ஐ.தே.கவின் வேட்பாளர் களமிறங்குவது இதுவே முதல் முறை. ஜனாதிபதித் தேர்தலுக்கான அவரது அறிக்கையில் “முன்னோக்கி ஒன்றாக” என்ற தலைப்பு வைக்கப்பட்டுள்ளது.
கோட்டாபய ராஜபக்ச
நந்தசேனா கோட்டபய ராஜபக்ஷ (70), இலங்கை பொதுஜன பெரமுன மற்றும் சு.க கூட்டணியின் வேட்பாளராக களமிறங்கியுள்ளார்.
தாமரை மொட்டு சின்னத்தின் கீழ் போட்டியிடும், கோட்டாபய 2005-2015 மஹிந்த ராஜபக்ஷ நிர்வாகத்தில் சக்திவாய்ந்த பாதுகாப்பு செயலாளர் பதவியை வகித்தார்.
ஜூன் 20, 1949 இல் பிறந்த கோட்டாபய கொழும்பின் ஆனந்த கல்லூரியில் கல்வி பயின்றார். அவர் ஏப்ரல் 1971 இல் இலங்கை இராணுவத்தில் கடட் அதிகாரியாக சேர்ந்து, 1972 இல் இரண்டாவது லெப்டினன்ட் ஆனார்.
ஆரம்பத்தில் சின்ஹ ரெஜிமென்ட்டில் பணியாற்றிய பின்னர், 1983 ஆம் ஆண்டில் கஜபா ரெஜிமென்ட்டுக்கு மாற்றப்பட்டார். 1983 ஆம் ஆண்டில், அவர் சென்னை பல்கலைக்கழகத்தின் பாதுகாப்பு ஆய்வுகள் முதுகலைப் பட்டம் பெற்றார். 1989 ஆம் ஆண்டில் அவர் 1 வது பட்டாலியன், கஜபா ரெஜிமென்ட்டின் கட்டளை அதிகாரியாக நியமிக்கப்பட்டு 1990 வரை பணியாற்றினார்.
இந்த நேரத்தில் அவர் யுனைடெட் ஸ்டேட்ஸ் இராணுவ தரைப்பட பாடசாலையில், ஃபோர்ட் பென்னிங்கில் மேம்பட்ட காலாட்படை அதிகாரிகள் கற்கைநெறியை முடித்து, லெப்டினன்ட் கேணல் பதவிக்கு உயர்த்தப்பட்டார். 1991 இல் சேர் ஜோன் கொத்தலாவல பாதுகாப்பு கல்லூரியின் துணை கட்டளை அதிகாரியாக நியமிக்கப்பட்டார்.
1992 ஆம் ஆண்டில் இராணுவத்திலிருந்து முன்கூட்டியே ஓய்வு பெற்று, அமெரிக்காவிற்கு குடிபெயர்ந்தார். அங்கு லொஸ் ஏஞ்சல்ஸில் உள்ள லயோலா சட்டப் பாடசாலையில் சிஸ்டம்ஸ் ஒருங்கிணைப்பாளராகப் பணியாற்றினார்.
ஜனாதிபதித் தேர்தலில் தனது சகோதரர் மஹிந்த ராஜபக்ஷ வெற்றி பெற்றதன் பின்னர் 2005 ல் இலங்கைக்குத் திரும்பினார். இரட்டை குடியுரிமை பெற்றார். பின்னர் அவர் பாதுகாப்பு செயலாளராக நியமிக்கப்பட்டார். டிசம்பர் 2006 இல் புலிகள் படுகொலை முயற்சியில் இருந்து தப்பினார்.
கோட்டாபய பின்னர் ஒரு கொழும்பு நகர அழகுபடுத்தும் இயக்கத்திற்கு தலைமை தாங்கினார். இது டச்சு மருத்துவமனை மற்றும் சுதந்திர ஆர்கேட் போன்ற பழைய கட்டிடங்களை மாற்றியது. அவர் கொழும்பிலும் அதைச் சுற்றியுள்ள பல நடைபாதைகளை உருவாக்கினார்.
சில ஆண்டுகளுக்கு முன்பு “வியத் மாகா” கருத்தரங்குகள் தொடங்கப்பட்டதன் மூலம் அவர் அரசியலில் நுழைந்தார். ஏப்ரல் 2019 இல் பெரமுன ஜனாதிபதி வேட்பாளராக அவர் “தயாராக” இருப்பதாக அறிவித்தார். அவரது சகோதரர் மஹிந்தவால் இரண்டு மாதங்கள் கழித்து ஒரு சிறப்பு மாநாட்டில் கிரங்கமாக அறிவிக்கப்பட்டது.
தேர்தலில் போட்டியிட தனது அமெரிக்க குடியுரிமையை கைவிட்டதாக கோட்டாபய அறிவித்தார். இலங்கையில் அவரது குடியுரிமை நிலை குறித்து தாக்கல் செய்யப்பட்ட வழக்கு மேல்முறையீட்டு நீதிமன்றத்தால் தள்ளுபடி செய்யப்பட்டது. எனினும், இரட்டை குடியுரிமை சர்ச்சை நீடிக்கிறது.
ஜெனரல் மகேஷ் சேனநாயக்க
ஜெனரல் மகேஷ் சேனநாயக்க தேசிய மக்கள் இயக்கத்தின் வேட்பாளர். அரசியலில் புதியவர் மற்றும் ஜனாதிபதித் தேர்தலில் போட்டியிடும் இரண்டாவது ஜெனரல். ஜெனரல் சேனநாயக்க சமீபத்தில் இலங்கை இராணுவத் தளபதியாக பதவிவகித்து ஓய்வு பெற்றார். மின்குமிழ் சின்னத்தில் போட்டியிடுகிறார். ஜெனரல் சேனநாயக்க (59) கொழும்பின் ஆனந்த கல்லூரியில் கல்வி பயின்றார்.
அவர் 1981 இல் இராணுவத்தில் சேர்ந்தார். 1983 இல் இரண்டாவது லெப்டினெண்டாக நியமிக்கப்பட்டார். 2006 ஆம் ஆண்டில், பிரிகேடியர் பதவியை அடைந்த அவர், இராணுவத் தலைமையகத்தில் திட்ட இயக்குநராக நியமிக்கப்பட்டார். அமெரிக்க இராணுவத்துடன் மூத்த மேலாளராக, திட்ட மேலாண்மை நிர்வாகியாக பணியாற்றினார்.
சிவில் முன்பதிவு செய்யப்பட்ட விமானக் கடற்படைக்கான (CRAF) ஆப்கானிஸ்தான் செயல்பாடுகள் மற்றும் மூலோபாய திட்டமிடல், சிறப்புப் படை ரெஜிமென்ட்டின் ரெஜிமென்டல் கட்டளை அதிகாரி, 211 காலாட்படை படையின் படையணி தளபதி- வவுனியா, சிறப்புப் படைப்பிரிவின் தளபதி, 52 பிரிவுக்கு தளபதி பொது அதிகாரி ஆகிய பதவிகளையும் சேனநாயக்க வகித்துள்ளார்.
2010 ஜனாதிபதித் தேர்தலில் பீல்ட் மார்ஷல் (அப்போதைய ஜெனரல்) சரத் பொன்சேகாவின் தோல்விக்குப் பின்னர் அவர் இலங்கையை விட்டு வெளியேறினார். ஆனால் ஜனவரி 2015 ஜனாதிபதித் தேர்தலில் ஜனாதிபதி மைத்திரிபால சிறிசேன வெற்றியைத் தொடர்ந்து திரும்பினார். பின்னர் அவர் இ ராணுவ செயலாளராக நியமிக்கப்பட்டார். .
2016 ஆம் ஆண்டில், அவர் யாழ்ப்பாணத்தின் தளபதியாக நியமிக்கப்பட்டார். இதன் போது உள்நாட்டில் இடம்பெயர்ந்தோரின் மீள்குடியேற்றத்தை மேற்பார்வையிடும் பொறுப்பு அவருக்கு இருந்தது. மார்ச் 22, 2017 அன்று சேனநாயக்க இராணுவத் தளபதியாக நியமிக்கப்பட்டு, ஜூலை 4, 2017 அன்று ஜனாதிபதி மைத்திரிபால சிறிசேனாவின் உத்தரவின் பேரில் லெப்டினன்ட் ஜெனரல் மற்றும் இராணுவ தளபதி பதவிக்கு உயர்த்தப்பட்டார். அவர் ஓகஸ்ட் 2019 இல் இராணுவத்தில் இருந்து ஓய்வு பெற்றார்.
யுனைடெட் ஸ்டேட்ஸ் ஆர்மி கொமாண்ட் மற்றும் ஜெனரல் ஸ்டாஃப் கல்லூரியில் பட்டம் பெற்ற இவர், இந்தியாவின் புனே, ஜவஹர்லால் நேரு பல்கலைக்கழகத்தில் சிவில் இன்ஜினியரிங் இளங்கலை பட்டம் பெற்றவர்.
அனுரகுமார திசாநாயக்க
ஏ.கே.டி என பிரபலமாக அழைக்கப்படும் அனுரகுமார திசாநாயக்க (51), ஜனதா விமுக்தி பெரமுனா (ஜே.வி.பி) தலைமையிலான தேசிய மக்கள் சக்தி பிரதிநிதித்துவப்படுத்தும் ஜனாதிபதி வேட்பாளர் ஆவார்.
இரண்டு தசாப்தங்களில் ஜே.வி.பி வேட்பாளர் ஜனாதிபதித் தேர்தலில் போட்டியிடுவது இதுவே முதல் முறையாகும். ஜே.வி.பியின் சொந்த- நன்கு அறியப்பட்ட மணி சின்னத்திற்கு பதிலாக திசைகாட்டி சின்னத்தில் போட்டியிடுகிறார்.
ஜே.வி.பி 2010 இல் பொதுவான வேட்பாளரை (சரத் பொன்சேகா) ஆதரித்தது. 2015 இல் நடுநிலை வகித்தது.
நவம்பர் 24, 1968 இல் பிறந்த ஏ.கே.டி, 2014 முதல் ஜே.வி.பி.யின் தலைவராக உள்ளார். மற்றும் நாடாளுமன்ற உறுப்பினராகவும் உள்ளார். ஜனாதிபதி சந்திரிகா பண்டாரநாயக்க குமாரதுங்கவின் கீழ் அமைக்கப்பட்ட குறுகிய கால தகுதிகாண் அரசாங்கத்தில் விவசாயம், கால்நடை, நிலம் மற்றும் நீர்ப்பாசன அமைச்சரவை அமைச்சராக சிறிதுகாலம் பணியாற்றினார்.
இவர் களனி, பெரதெனிய பல்கலைக்கழகத்தின் மாணவர்.
ஜேவிபியின் கண்ணோட்டத்திலும் கொள்கைகளிலும் ஏ.கே.டி தலைவராக நியமிக்கப்பட்டதைத் தொடர்ந்து ஒரு தெளிவான மாற்றம் ஏற்பட்டது. முன்னாள் தலைவர் சோமவன்ச அமரசிங்க பழையவர் என்றாலும், புதிய தலைமுறைக்கு ஏற்றவாறு கட்சியை புதிய திசையில் ஏ.கே.டி எடுத்து சென்றார்.
இன்று பாராளுமன்றத்தில் சிறந்த சிந்தனையாளர்கள் மற்றும் சொற்பொழிவாளர்களில் ஒருவரான ஏ.கே.டி அரசியல் சூழ்நிலைகள் பற்றிய அற்புதமான பகுப்பாய்விற்கு பெயர் பெற்றவர். ஒவ்வொரு பாராளுமன்ற அல்லது தொலைக்காட்சி விவாதத்திலும் அவர் பிரகாசிக்கிறார், அவர் உண்மைகள் மற்றும் புள்ளிவிவரங்களுடன் முழுமையாக தயாராக இருக்கிறார்.
