உண்மையான விடுதலைப் புலிகள் யாரும் சிறையில் இல்லை. முன்னாள் மாகாண அமைச்சர் அனந்தி சொல்வது உண்மையில்லை என தெரிவித்துள்ளார் விநாயகமூர்த்தி முரளிதரன்..
மட்டக்களப்பு களுதாவளை ஈஸ்வரன் ஆலய முன்றலில் வெள்ளிக்கிழமை (31) இடம்பெற்ற பொங்கல் விழாவின் பின்னர், செய்தியாளர்களிடம் பேசும்போது இதனை தெரிவித்தார்.
வட மாகாணத்தில் இடம்பெற்ற செய்தியாளர் சந்திப்பொன்றில் முன்னாள் வடமாகாண சபை உறுப்பினர் அனந்தி சசிதரன் தெரிவித்தபோது, விடுதலை புலிகள் அமைப்பில் இருக்கும்போது போராளிகளை வழிநடத்திய தளபதியாக இருந்த கருணா அம்மான் வெளியில் உல்லாசமாக இருக்கின்றார். போராடிய போராளிகள் உள்ளே இருக்கின்றனர் என்று குறிப்பிட்டிருந்தார். இந்தக் கருத்தை நீங்கள் எவ்வாறு பார்க்கின்றீர்கள் என எழுப்பிய கேள்விகளுக்கு பதிலளிக்கையில் மேற்கண்டவாறு தெரிவித்தார்.
அவர் மேலும் தெரிவிக்கையில், அனந்தி சசிதரன் அவர்களும் ஒரு போராளியாக இருந்தவர். அவரும் தற்போது வெளியில் தான் இருக்கின்றார் என்பதை புரிந்து கொண்டு பேச வேண்டும். கிட்டத்தட்ட 12 ஆயிரம் போராளிகள் இறுதி யுத்தத்தில் சரணடைந்தார்கள். அவர்கள் அனைவரும் அன்றிருந்த ஜனாதிபதி மஹிந்த ராஜபக்ஷ அவர்களுடன் பேசி புனர்வாழ்வளிக்கப்பட்டு விடுவிக்கப்பட்டு இருக்கிறார்கள். தற்போது சிறையில் உள்ளவர்கள் அரசியல் கைதிகள். உண்மையான விடுதலைப் புலிகள் சிறையில் இல்லை. விடுதலைப் போராட்டத்திற்கு உதவி செய்தவர்களும், ஆதரவு அளித்தவர்களுமே சிறையில் இருக்கின்றனர். அவர்களையும் படிப்படியாக விடுவிக்க முதற்கட்ட நடவடிக்கைகள் நடைபெற்றிருக்கின்றன. ஜனாதிபதி கோட்டாபய ராஜபக்ஷ இதற்கான உத்தரவை விடுத்திருக்கிறார் என்பதை கூற விரும்புகின்றேன் என கூறினார்.
