கார்த்திகை (பாதம் 2,3,4), ரோகிணி, மிருகசீரிஷம் (பாதம் 1,2) ஆகிய நட்சத்திரங்களை அடங்கிய ரிஷப ராசியினருக்கு ராகு கேது பெயர்ச்சி 2020 பலன்கள் எப்படி இருக்கும்.
குரு, சனி பெயர்ச்சி பலன்கள் எப்படி தாக்கத்தை ஏற்படுத்தும் என்பதை இந்த பதிவில் பார்ப்போம்…
ஜோதிடத்தில் கிரகங்களின் பெயர்ச்சி தான் மிக முக்கியமானதாகப் பார்க்கப்படுகிறது. ஒவ்வொரு கிரகங்கள் ஒவ்வொரு ராசியாக பெயர்ச்சி ஆகும் போது அவை தரக்கூடிய பலன்கள் ஒவ்வொரு ராசிக்கும் வேறுபடும்.
அதில் சுப கிரகங்கள், அசுப கிரகங்கள் என அவை வந்து அமைவதால் கிடைக்கும் பலன், அல்லது அந்த கிரகங்கள் ஒரு ராசியில் அமர்ந்து உங்கள் ராசியின் மீது செலுத்தக் கூடிய பார்வை பலன்கள் என பலன்கள் கணிக்கப்படுகின்றன.
அப்படி சில கிரகங்கள் சாதகமாகவும், சில கிரகங்கள் சாதகமற்ற நிலையில் அமர்ந்து நமக்கான பலன்களைத் தருகின்றனர். அதுமட்டுமல்லாமல் எந்த ஒரு கிரகமாக இருந்தாலும் அதனால் முழுமையாக நற்பலனோ அல்லது முழு கெடு பலனோ கொடுக்க முடியாது என்பதே ஜோதிட விதி.
அந்த வகையில் வரும் செப்டம்பர் 1ம் தேதி வாக்கிய பஞ்சாங்கப்படியும், செப்டம்பர் 23ம் தேதி திருக்கணித பஞ்சாங்க முறைப்படி ராகு – கேது எனும் சர்ப்ப கிரகங்கள் பெயர்ச்சி நடைபெற உள்ளது. எப்போதும் எதிர்புறமாக அதாவது கடிகார சுற்றுவதற்கு எதிர் திசையில் சுற்றும் ராகு ரிஷப ராசிக்கும், கேது விருச்சிக ராசிக்கும் பெயர்ச்சி ஆக உள்ளனர்.
ரிஷபத்தின் பொது குணம்
சுக்கிரனை ராசி நாதனாக கொண்டவர்கள் ரிஷப ராசியினர். இவர்கள் பரந்தமனம் கொண்டவர்களாக, சுக போக வாழ்க்கையை வாழக் கூடியவர்களாக இருப்பார்கள். இருப்பினும் இவர்களிடம் தாழ்வு மனப்பான்மை, பிடிவாதம், நிம்மதியற்று அலையும் மனம், சிலர் கடவுள் நம்பிக்கையற்று இருப்பவராக இருக்கக் கூடும்.
இருப்பினும் இவர்களின் கனவு, லட்சியம் எல்லாம் மிகப் பெரிதாக இருக்கும்.
இந்த பெயர்ச்சியில் ஜென்ம ராசியில் ராகுவும், விருச்சிகத்தில் கேதுவும் அமர்கின்றனர். பொதுவாக ஜென்ம ராசியில் அதாவது பிறக்கும் போது சந்திரன் அமர்ந்திருந்த ராசியில் எந்த ஒரு கிரகம் வந்தாலும் அதனால் பெரியளவு நன்மை நடைபெறாது.
அது சுப கிரகமாக இருந்தாலும், அசுப கிரகமாக இருந்தாலும் சரி. தற்போது அசுப கிரகங்களில் ஒன்றான ராகு ராசியில் வந்து அமர்கிறார்.
சந்திக்க வேண்டிய பிரச்னைகள்
சொந்த குடும்பத்தில் சிலர் கருத்து வேறுபாடு ஏற்படுவதற்கான காலம். எடுத்த முயற்சிகள் வெற்றியை தர இழுபறியான நிலை. நெருக்கடியான நிலை இருக்கும். இதனால் எதை செய்வதாக இருந்தாலும் சற்று தயக்கத்தோடு தொடங்கும் மன நிலை இருக்கும்.
தொழில், உத்தியோகத்தில் நாம் எதிர்பார்த்த முன்னேற்றம் தடைப்படும். நம் திறமை மீது நமக்கே சில நேரங்களில் சந்தேகம் தோன்றும். சுப காரிய முயற்சிகள் தள்ளிப்போகலாம்.
அதிர்ஷ்டத்தைத் தர வரும் குரு
என்ன தான் ராகு ராசியில் அமர்ந்து இதுவரை இருந்த இழுபறி நிலையை நீட்டிக்கச் செய்தாலும், அடுத்து அக்டோபர் மாதத்தில் நிகழக் கூடிய குரு பெயர்ச்சி மிகப்பெரிய யோகத்தையும், கவலைகளைத் தீர்க்கக் கூடிய அருமருந்தாகச் செயல்படுவார்.
ராகு கேது பெயர்ச்சி நடந்து ஒன்றரை மாதத்தில் குரு மகர ராசிக்கு பெயர்ச்சி ஆவார். ரிஷப ராசிக்கு 9ம் இடத்தில் குரு அமர்வது மிக யோகத்தை தரக்கூடியதாக இருக்கும்.
ராகு கேது பெயர்ச்சியினால் எந்த செயலையும் நினைத்தபடி செய்து முடிக்க முடியவில்லை என வருந்தக் கூடியவர்களுக்கு விமோசனமாக குரு பகவான் அமைவார்.
அதுமட்டுமல்லாமல் ராசியில் ராகு அமர்ந்து தரக்கூடிய இன்னல்களை, குரு 9ம் இடத்தில் அமர்ந்து சுப பார்வையால் நிவர்த்தி செய்வார். ராகு கேதுவால் இருந்த போராட்ட நிலைமை மாறும். தொழிலிலும், பணியிடத்திலும் இருந்த தடங்கள் நிவர்த்தி ஆகும் நிலை உருவாகும்.
தொழில், வியாபாரத்தில் எதிர்பார்த்த முன்னேற்றத்தை பெறுவதற்கான வாய்ப்புகள் அமையும். இதுவரை இருந்த பொருளாதார தடைகள் நீங்குவதோடு, கடன்கள் அடைப்பதற்கான மிக நல்ல காலமாக அமையும்.
வேலை தேடுபவர்களுக்கும், வேறு நிறுவனத்தில் வேலை தேடுபவர்களுக்கும், இடமாற்றம் எதிர்பார்பவர்களுக்கு மிக நல்ல செய்தியை குரு தருவார். திருமணம் உள்ளிட்ட சுப காரிய முயற்சிகளுக்கு வெற்றியைத் தருவார். குழந்தை பாக்கியம் அருள்வார். உடல் ஆரோக்கியத்தைப் பொறுத்த வரையில் நல்ல முன்னேற்றத்தை தருவார்.
எதிரிகள் தொல்லை, மனக் குழப்பமும் நீங்கி தைரியமும், தன்னம்பிக்கையோடு எழுச்சி பெறுவீர்கள்.
இப்படி குருவினால் நாம் எதிர்பார்த்ததை விட மிக நல்ல பலன்களைப் பெறலாம். இருப்பினும் ராகு கேது பெயர்ச்சி நடந்து ஒன்றரை மாதங்கள் வரை நாம் சற்று சமாளித்து தான் ஆக வேண்டும்.
குரு பலனை தடுப்பாரா சனி
வாக்கிய பஞ்சாங்கத்தின் படி சனி பகவான் டிசம்பர் மாதம் 26ம் தேதி நிகழ்கிறது. தன்னுடைய சொந்த வீட்டில் அதாவது மகரத்தில் சனி பகவான் பெயர்ச்சி ஆகிறார்.
இதனால் ரிஷப ராசிக்கு கேடு விளையுமா, தடங்கல் ஏற்படுமா என்றால் இல்லை… குரு கொடுப்பவராக, தடங்கலை நீக்குபவராக செயல்படுவார். வாழ வைப்பவராக செயல்படுவார். சனி பகவான் உங்களை வாழ்த்தைப் போவராக செயல்படுவார்.
அதோடு உங்கள் ஜனன கால ஜாதக கிரக நிலை, தசா புத்தி சாதகமாக அமைந்துவிட்டால் உங்களுக்கு நிச்சயம் ஏற்றம் தான் என்பதில் சந்தேகமில்லை.
இதனால் செப்டம்பரில் நிகழக் கூடிய ராகு கேது பெயர்ச்சியால் ரிஷப ராசிக்கு பெரிய நல்ல பலனை எதிர்பார்க்க முடியாது என்றாலும், அடுத்து நிகழும் குரு, சனி பெயர்ச்சி மிகச் சிறப்பான முன்னேற்ற நிலையைத் தருவார் என்பதால் ரிஷப ராசியினர் மனக் குழப்பமின்றி இருக்கலாம்.
பரிகாரம்
- ரிஷபம் ராசியில் இருக்கும் நட்சத்திரங்களுக்கு உரிய மரங்கள்
- கார்த்திகை – அத்தி மரம்
- ரோகிணி – நாவல் மரம்
- மிருகசீரிஷம் – கருங்காலி மரம் ஆகிய மரங்களை நட்டு பராமரித்து வளர்க்கலாம். இதனால் மிகுந்த நற்பலன்களைப் பெறலாம்.
- தினமும் வீட்டில் விளக்கேற்றி வழிபடவும். தினமும் 3 மணி நேரம் விளக்கு எரிவதால் வீட்டில் நன்மையும், செல்வமும் சேரும். ஸ்ரீ ரங்கனை வணங்கி வருவதால் சர்ப்ப கிரக தோஷங்கள் நீங்கும்.
