அச்சமின்றி

விஜய் வசந்த், கருணாஸ், தேவதர்ஷினி, சண்முகசுந்தரம் நால்வரும் பிக் பாக்கெட் அடிப்பதையே தொழிலாக செய்து வருகிறார்கள். இவர்களுடைய ஏரியாவுக்கு இன்ஸ்பெக்டராக வருகிறார் சமுத்திரகனி. அதே ஏரியாவில் வாய் பேசமுடியாத வித்யா தனிமையில் வசித்து வருகிறார். அவர் மீது சமுத்திரகனி இரக்கம் காட்ட, அந்த இரக்கம் நாளடைவில் காதலாக மாறுகிறது.

இந்நிலையில், ஒருநாள் பஸ்ஸில் விஜய் வசந்தை சந்திக்கிறாள் சிருஷ்டி டாங்கே. இவர்களுடைய முதல் சந்திப்பே மோதலாக மாறி, போலீஸ் நிலையம் வரை செல்கிறது. ஒரு கட்டத்தில் தனது தவறை உணர்ந்த சிருஷ்டி டாங்கே, விஜய்யிடம் மன்னிப்பு கேட்கிறார். அதன்பிறகு, இருவரும் காதலிக்க ஆரம்பிக்கின்றனர்.

இந்நிலையில், சமுத்திரகனி காதலிக்கும் வித்யா ஒரு விபத்தில் இறக்கிறாள். அது விபத்து இல்லை, திட்டமிட்டு செய்த கொலை என்று சமுத்திரகனிக்கு சந்தேகம் ஏற்படுகிறது. இதுகுறித்து விசாரிக்க களமிறங்க நினைக்கும்போது, அவரது உயரதிகாரி, போலீஸ் மற்றும் ரவுடி கும்பலின் உதவியோடு இவரை கொலை செய்ய திட்டமிடுகிறார்.

அதிலிருந்து தப்பித்து செல்லும் சமுத்திரகனி, உயிர் பயத்தோடு ஓடிவரும் நாயகனையும் நாயகியையும் சந்திக்கிறார். சமுத்திரகனியை கொல்ல துடிப்பவர்களே, இவர்களையும் கொலை செய்ய துடிக்கிறார்கள் என்பதை ஒருவருக்கொருவர் அறிந்து கொள்கிறார்கள். மூன்று பேரும் இணைந்து தங்களை கொலை செய்ய நினைப்பவர்களை எதிர்க்க களமிறங்குகிறார்கள்.

அப்போது தங்களை கொல்லத் துடிக்கும் ரவுடி கும்பலின் பின்புலத்தில் கல்வியமைச்சர் ராதாரவியின் உதவியாளர் ஜெயக்குமார் ஜானகிராமன் இருப்பது தெரியவருகிறது. சமுத்திரகனி, விஜய் வசந்த், சிருஷ்டி டாங்கே மூன்று பேரையும் அவர் கொல்ல துடிப்பதன் காரணம் என்ன? இந்த கொலை முயற்சியில் இருந்து தப்பித்தார்களா? வித்யாவை யார்? எதற்காக கொன்றார்கள்? என்பதற்கு விறுவிறுப்புடன் கூடிய பதிலை பிற்பாதியில் சொல்லியிருக்கிறார்கள்.

பிக்பாக்கெட் திருடனாக வரும் விஜய் வசந்த் தனது நகைச்சுவை கலந்த எதார்த்த நடிப்பில் அனைவரையும் கவர்கிறார். முதல் பாதியில் இவரது கதாபாத்திரம் நகைச்சுவையாக நகர்ந்தாலும், சமுத்திரகனியிடம் இணைந்த பிறகு ஆக்சனுக்கு மாறுகிறது. ஆக்சன் காட்சிகளில் ஆக்ரோஷமாக நடித்திருக்கிறார். தனக்கேற்ற சரியான கதையை தேர்வு செய்து, நாயகன் அந்தஸ்தை முழுமையாக காட்டிக் கொள்ளாமல், தனது கதாபாத்திரத்திற்கு ஏற்ற நடிப்பை முழுமையாக கொடுத்திருக்கிறார்.

சிருஷ்டி டாங்கே அழகு பதுமையாக படம் முழுக்க வலம் வந்திருக்கிறார். காதல் காட்சிகள் மட்டுமில்லாது, செண்டிமெண்ட் காட்சிகளிலும் ரசிக்க வைக்கிறார். பரபரப்பான காட்சிகளில் தனது நடிப்பை சிறப்பாக செய்து தனது கதாபாத்திரத்தை பூர்த்தி செய்திருக்கிறார்.

பொறுப்பான போலீஸ் அதிகாரியாக வரும் சமுத்திரகனி, வழக்கம்போல் தனது அசாத்தியமான நடிப்பை எதார்த்தமாக பதிவு செய்திருக்கிறார். தான் காதலித்த பெண்ணின் மரணத்திற்கு பிறகு செண்டிமெண்ட் கலந்த கோபத்தோடு எதிரிகளை துவம்சம் செய்யும் காட்சிகள் எல்லாம் பலே சொல்ல வைக்கிறது.

ராதாரவியின் கதாபாத்திரத்தை ஆரம்பத்தில் வில்லத்தனமாக சித்தரித்து, இறுதியில் அவர் மிகவும் நேர்மையானவர் என்பதுபோல் காட்சிப்படுத்தியிருக்கிறார் இயக்குனர். இதை உணர்ந்து சிறப்பாக நடித்து தனது கதாபாத்திரத்திற்கு பெயர் வரும்படி செய்திருக்கிறார் ராதாரவி. குறிப்பாக, இறுதிக் காட்சியில் நீதிமன்றத்தில் இவர் பேசும் வசனங்கள் மிகவும் யோசிக்கக்கூடியதாக உள்ளது.

இதுவரையிலான படங்களில் பிரியமான அம்மாவாக வந்த சரண்யா பொன்வண்ணன், இந்த படத்தில் பிடிவாத சரண்யாவாக நடித்துள்ளார். கல்வி நிறுவனங்கள் நடத்தும் மிகப்பெரிய தொழிலபதிரான இவர், தனது கட்டுப்பாட்டுக்குள் அனைவரையும் கொண்டு வரும் மிடுக்கான தோற்றத்துடன் கம்பீரமாக வலம் வந்திருக்கிறார். இவருக்கு இந்த கதாபாத்திரம் புதிது என்றாலும் அதை அழகாக கையாண்டு வெற்றி பெற்றிருக்கிறார் என்றே சொல்லவேண்டும். இனிமேல், சரண்யா பொன்வண்ணன் இதுமாதிரியான கதாபாத்திரங்களிலும் நடித்து அவரது நடிப்பு திறமையை இன்னும் மேலே கொண்டுவர வேண்டும் என்பதுதான் படம் பார்த்தவர்களின் ஆவலாக உள்ளது.

வாய் பேசமுடியாமல் வரும் வித்யா, வக்கீலாக வரும் ரோகிணி, கலெக்டராக வரும் தலைவாசல் விஜய், கும்கி அஸ்வின் ஆகியோரும் தங்கள் கதாபாத்திரத்தை உணர்ந்து சிறப்பாக நடித்திருக்கிறார்கள். கருணாஸ், தேவதர்ஷினி, சண்முக சுந்தரம் கூட்டணியில் காமெடி ரசிக்கும்படி இருக்கிறது.

ஏற்கெனவே, விஜய் வசந்தை வைத்து ‘என்னமோ நடக்குது’ என்ற ஹிட் படத்தை கொடுத்த ராஜபாண்டியே இப்படத்தையும் இயக்கியிருக்கிறார். இப்படத்தின் மூலம் தனியார் கல்வி நிறுவனங்களும், அரசாங்கமும், மக்களும் கல்வியை எப்படி நாடுகிறார்கள்? என்பதை விவாதத்துக்கு கொண்டு வந்து, அதற்கான தீர்வையும் சொல்லியிருக்கிறார். படத்தில் இவர் சொல்லியிருக்கும் கருத்தை எல்லோருக்கும் எளிதில் புரியும்படி திரைக்கதை அமைத்து இயக்கியிருப்பது படத்திற்கு பெரிய பலம். அதேபோல், கல்வி முறையில் கட்டாயம் மாற்றம் வேண்டும் என்ற பொறுப்புணர்வோடு படத்தை எடுத்திருக்கும் இந்த குழுவை நாம் பாராட்டியே ஆகவேண்டும்.

பிரேம்ஜி அமரனின் இசையில் பாடல்கள் எல்லாம் இளையராஜாவின் சாயல் இருக்கிறது. சுட்ட பழமாக இருந்தாலும் சுவையாக இருக்கிறது. பின்னணி இசையும் ரசிக்கும்படி இருக்கிறது. வெங்கடேஷின் ஒளிப்பதிவும் அருமையாக இருக்கிறது. சண்டைக் காட்சிகளில் எல்லாம் இவரது கேமரா சுழன்று படமாக்கியிருக்கிறது.

மொத்தத்தில் ‘அச்சமின்றி’ ஒரு கல்வி புரட்சி.