விஜய்யின் தளபதி 65 படத்தில் நடிப்பது குறித்து தான் இன்னும் ஒரு முடிவுக்கு வரவில்லை என்று பூஜா ஹெக்டே தெரிவித்துள்ளார். இதை பார்த்த சிலர் பூஜாவுக்கு வில்லங்கமான அறிவுரை வழங்கியிருக்கிறார்கள்.
மாஸ்டர் படத்தை அடுத்து ஓய்வில் இருக்கும் விஜய் அடுத்ததாக கோலமாவு கோகிலா படம் புகழ் நெல்சன் திலீப்குமார் இயக்கத்தில்
தளபதி 65 படத்தில் நடிக்கிறார். அந்த படத்தை சன் பிக்சர்ஸ் தயாரிக்கிறது. தளபதி 65 படத்தில் இரண்டு ஹீரோயின்கள் என்று கூறப்படுகிறது.
பூஜா ஹெக்டேவையும், ரஷ்மிகா மந்தனாவையும் தேர்வு செய்திருக்கிறார்களாம். மிஷ்கின் இயக்கத்தில் ஜீவா நடித்த முகமூடி படம் மூலம் தான் பூஜா ஹெக்டே திரையுலகில் அறிமுகமானார். ஆனால் அந்த படத்திற்கு பிறகு அவர் தமிழில் நடிக்கவில்லை.
தொடர்ந்து தெலுங்கு மற்றும் இந்தி படங்களில் தான் நடித்து வருகிறார். இந்நிலையில் தளபதி 65 படத்தில் நடிப்பது குறித்து பூஜா கூறியிருப்பதாவது,
விஜய்யுடன் ஜோடியாக நடிப்பது இன்னும் உறுதி செய்யப்படவில்லை. நான் இன்னும் ஒரு முடிவுக்கு வரவில்லை. ஆனால் நான் விஜய் படத்தில் நடிக்க ஆசைப்படுகிறேன். எனவே இது ஒர்க்அவுட் ஆகும் என்கிற நம்பிக்கை இருக்கிறது என்றார்.
தளபதி 65 படத்தில் நடிப்பது குறித்து பூஜா யோசனையில் இருப்பதை அறிந்த விஜய் ரசிகர்களோ, இதில் யோசிக்க என்ன இருக்கிறது, உடனே சரி என்று சொல்லுங்கள் என தெரிவித்துள்ளனர். சினிமா ரசிகர்கள் சிலரோ, வேண்டாம் பூஜா, ஹீரோயின் என்று சொல்வார்கள், ஆனால் நாலே நாலு காட்சியில் தான் வருவீர்கள், அதனால் நடிக்க முடியாது என்று கூறி எஸ்கேப் ஆகிவிடுங்கள் என்று அறிவுரை வழங்கியுள்ளனர்.
தளபதி 65 படப்பிடிப்பை ஏப்ரல் மாதம் துவங்குகிறார்கள். முதல்கட்ட படப்பிடிப்பு ரஷ்யாவில் நடக்கப் போகிறது. இந்த படத்திற்கு நெல்சனின் நெருங்கிய நண்பரான அனிருத் தான் இசையமைக்கிறார். தளபதி 65 படத்தில் நடிக்க விஜய்க்கு பெரிய தொகையை சம்பளமாக பேசியிருக்கிறார்களாம்.
மாஸ்டரில் விஜய் சேதுபதி எனும் வெயிட்டான வில்லன் இருந்தார். அதனால் தளபதி 65 படத்திலும் கெத்து வில்லனை எதிர்பார்க்கிறார்கள் ரசிகர்கள்.
