புதுடில்லி, மார்ச் 6-இங்கிலாந்துக்கு எதிரான கிரிக்கெட் டெஸ்ட் தொடரில் அகமதாபாதில் இன்று முடிவடைந்த கடைசி டெஸ்ட் ஆட்டத்தில் எதிர்பார்க்கப்பட்டதைவிட இந்தியா எளிதாக வென்றது. இந்திய அணி 1 இன்னிங்ஸ் மற்றும் 25 ரன்கள் வேறுபாட்டில் வெற்றி பெற்று தொடரை கைப்பற்றியது. இதன்வழி உலக டெஸ்ட் சாம்பியன்ஷீப் போட்டிக்கும் இந்தியா தகுதி பெற்றது.
சென்னையில் நடைபெற்ற முதல் டெஸ்ட்டில் இங்கிலாந்து 227 ரன்கள் வேறுபாட்டில் இந்திய அணியை வீழ்த்தியது. 2 ஆவது டெஸ்ட் ஆட்டத்தில் 317 ரன்கள் வேறுபாட்டில் இந்திய அணி வெற்றி பெற்று தொடரை 1-1 என சமப்படுத்தியது. அதன் பின் 3ஆவது மற்றும் 4 ஆவது டெஸ்ட் ஆட்டங்கள் அகதாபத்தில் நடைபெற்றன. அந்த இரண்டு டெஸ்ட் ஆட்ங்களிலும் வெற்றி பெற்று தொடரை 3-1 எனக் கைப்பற்றி ஜூன் மாதம் லண்டனில் நடைபெறவுள்ள உலக சாம்பியன்ஷீப் போட்டியில் நியூசிலாந்துடன் மோதுவதற்கு இந்தியா தகுதி பெற்றது. இந்த வெற்றியின் மூலம் ஐசிசி டெஸ்ட் தர வரிசையில் முதல் இடத்திற்கு இந்தியா முன்னேறியது
