இந்திய கிரிக்கெட் அணியிலிருந்து ஒட்டுமொத்தமாக தனது கேப்டன் பொறுப்புகளை மகேந்திர சிங் டோனி துறந்து விட்டார். அடுத்து வரக்கூடிய போட்டிகளில் விராட் கோலியின் தலைமையில் டோனி ஆடவிருக்கிறார்.
இந்நிலையில் நீண்ட நாள் கழித்து இந்திய அணிக்குத் திரும்பியிருக்கும் கிரிக்கெட் வீரர் யுவராஜ்சிங், டோனியைப் பேட்டி எடுத்து தனது டுவிட்டர், இன்ஸ்டாகிராம் பக்கத்தில் பகிர்ந்துள்ளார்.
தனது நண்பனும், முன்னாள் கேப்டனுமான டோனியைப் பார்த்து இந்திய அணியின் கேப்டனாக நீங்கள் கடந்து வந்த பாதை குறித்து? என யுவராஜ் கேட்க அதற்கு டோனி “கேப்டன் பொறுப்பு எளிதானது அல்ல என்றாலும், இந்த பயணம் மிகவும் சிறப்பானதாக இருந்தது” என்றார்.
எப்போதுமே நீங்கள் ஒரு சிறந்த கேப்டன். உங்களது தலைமையில் விளையாடிய அனுபவம் அற்புதமானது. மூன்று சாம்பியன்ஷிப்களை வென்றது, உலகக் கோப்பையை வென்றது, டெஸ்ட் கிரிக்கெட்டில் நம்பர் 1 இடத்தைப் பிடித்தது” என்று யுவராஜ், டோனியைப் புகழ, இடைமறித்த டோனி “சிறந்த இருக்கையில் அமர்ந்து உங்களின் ஆறு சிக்ஸ்களை நான் பார்த்தேன்” என்கிறார்.
கடைசியாக யுவராஜ், ‘நீங்கள் தற்போது கேப்டனாக இல்லை உங்களிடமிருந்து நாங்கள் நிறைய சிக்சர்களை எதிர்பார்க்கலாமா?’ என்று கேட்கிறார். அதற்கு டோனி “சரியான தருணத்தில் சூழ்நிலை சாதகமாக அமைந்தால் நான் நிறைய சிக்சர்களை பறக்க விடுவேன்” என்று கூறியிருக்கிறார்.
யுவராஜ்-டோனியின் இந்த வீடியோ சமூக வலைதளங்களில் தற்போது வைரலாகி வருகிறது.
