தொற்றுநோய் காரணமாக வீடுகளிலிருந்தே வேலை செய்ய தொடங்கியுள்ளதாலும், இணைய பயன்பாடு அதிகரித்துள்ளதாலும் இணையத்தில் நடக்கும் மோசடிகளும் வேகமாக அதிகரித்து வருகின்றன. இதை கருத்தில் கொண்டு, அதற்கு எதிரான நடவடிக்கைகளை எடுக்க மத்திய அரசு ஒரு தேசிய ஹெல்ப்லைன் எண்ணை (155260) அறிமுகப்படுத்தியுள்ளது. இணைய மோசடி காரணமாக அடிக்கடி நிகழும் நிதி இழப்பைக் கட்டுப்படுத்த இந்த சேவை உதவியாக இருக்கும் என்று தெரிவிக்கப்பட்டுள்ளது.
சைபர் மோசடியால் பாதிக்கப்பட்டவர்கள் இந்த ஹெல்ப்லைன் எண்ணை தொடர்பு கொண்டால் நேரடியாக தொடர்புடைய மாநில போலீசாருடன் இணைக்கிறது. இந்த சேவை சோதனை முயற்சியாக ஏழு மாநிலங்கள் மற்றும் யூனியன் பிரதேசங்களில் அறிமுகம் செய்யப்பட்டுள்ளது.
உள்துறை அமைச்சகத்தின் யோசனை
மத்திய அரசின் புதிய தேசிய இணைய மோசடி ஹெல்ப்லைன் மற்றும் அறிக்கையிடல் தளம் மத்திய உள்துறை அமைச்சர் அமித் ஷா தலைமையில் செயல்படும் உள்துறை அமைச்சகத்தின் (MHA) யோசனையின் அடிப்படையில் உருவாக்கப்பட்டுள்ளது.
இந்த ஹெல்ப்லைன் எண் ஏப்ரல் 1 ஆம் தேதியே அறிமுகம் செய்யப்பட்டிருந்தாலும், இது ஜூன் 17 அன்று தான் MHA வின் துணை நிறுவனமான இந்திய சைபர் குற்ற ஒருங்கிணைப்பு மையத்தின் (I4C) சேவையில் சேர்க்கப்பட்டது.
வங்கிகள் ஆதரவு
புதிய ஹெல்ப்லைன் மற்றும் அதன் அறிக்கையிடல் தளம் இந்திய ரிசர்வ் வங்கி (ரிசர்வ் வங்கி), அனைத்து முக்கிய பொது மற்றும் தனியார் துறை வங்கிகள், முக்கிய ஆன்லைன் வாலட் ஆபரேட்டர்கள் மற்றும் இ-காமர்ஸ் தளங்களின் ஆதரவுடன் இயங்கும். Paytm, PhonePe மற்றும் MobiKwik ஆகியவையும் இந்த சேவைக்கு தங்கள் ஆதரவை வழங்கும்.
அறிமுகம் செய்யப்பட்டதிலிருந்து, இந்த ஹெல்ப்லைன் ரூ.1.85 கோடிக்கு மேல் சேமிக்க உதவியதாக அரசாங்கம் தெரிவித்துள்ளது.
இந்தியாவில் இணைய மோசடிகளைத் தடுக்க சட்ட அமலாக்க நிறுவனங்களை வங்கிகள் மற்றும் பிற நிதி இடைத்தரகர்களுடன் ஒருங்கிணைப்பதே I4C உருவாக்கிய தளத்தின் பின்னணியில் உள்ள நோக்கமாக உள்ளது.
இந்த ஹெல்ப்லைன் எப்படி செயல்படுகிறது?
- இணைய மோசடியால் பாதிக்கப்பட்டவர் ஹெல்ப்லைனை டயல் செய்யும் போது, ஒரு போலீஸ் அதிகாரி மோசடி பரிவர்த்தனை விவரங்களையும் அழைப்பவரின் அடிப்படை தனிப்பட்ட தகவல்களையும் Citizen Financial Cyber Frauds Reporting and Management System பதிவேற்றுவார்.
- பதிவேற்றிய தரவுகளைக் கொண்ட ஒரு டிக்கெட் பின்னர் சம்பந்தப்பட்ட வங்கிகள், வாலெட்ஸ், வணிகர்கள் போன்றவர்களின் கவனத்திற்குச் கொண்டு செல்லப்படும்.
- மேலும் தேசிய சைபர் கிரைம் ரிப்போர்டிங் போர்ட்டலில் (https://cybercrime.gov.in/) கூடுதல் தேவையான விவரங்களை 24 மணி நேரத்திற்குள் எவ்வாறு சமர்ப்பிப்பது என்பதற்கான வழிமுறைகளுடன், பாதிக்கப்பட்டவர் புகார் எண்ணைக் கொண்ட எஸ்எம்எஸ் ஒன்றையும் பெறுவார்.
- மோசடி செய்த பணத்தை வங்கிகளால் முடக்க முடியும், எனவே மோசடி செய்பவர்கள் அதை அணுக முடியாத படி இதன் மூலம் செய்ய முடியும்.
- பணம் டெபிட் செய்யப்பட்ட சம்பந்தப்பட்ட வங்கியால் சரியான நேரத்தில் பரிவர்த்தனையை நிறுத்த முடியவில்லை மற்றும் மோசடி செய்யப்பட்ட பணம் வேறு வங்கிக்கு மாற்றப்பட்டால், அந்த டிக்கெட் பணத்தைப் பெற்ற வங்கிக்கும் புகார் அளிக்கப்பட்டு தடைச் செய்யப்படும்.
- புகார்தாரரிடம் பணம் திரும்ப வரும் வரையிலும், மோசடி செய்பவர்கள் போலீஸ் கைகளில் சிக்கும் வரை இந்த செயல்முறை மீண்டும் செய்யப்படுகிறது.
எங்கெல்லாம் இந்த சேவை கிடைக்கும்?
தொடக்கத்தில், சத்தீஸ்கர், டெல்லி, மத்தியப் பிரதேசம், ராஜஸ்தான், தெலுங்கானா, உத்தரகண்ட், மற்றும் உத்தரப்பிரதேசம் உள்ளிட்ட ஏழு மாநிலங்கள் மற்றும் யூனியன் பிரதேசங்களில் ஹெல்ப்லைன் மற்றும் அறிக்கையிடல் தளம் தொடங்கப்பட்டுள்ளது.
இந்தியா முழுவதும் இந்த சேவையை தொடங்குவதற்கான செயல்பாடுகள் ஏற்கனவே நடந்து வருவதும் குறிப்பிடத்தக்கது.
