தமிழகத்தில் நடைபெறும் ஜல்லிக்கட்டு ஆதரவு போராட்டத்துக்கு ரஜினி, கமல், விஜய், சூர்யா உள்ளிட்ட முன்னணி நடிகர்கள் ஆதரவு தெரிவித்துள்ளனர்.
மெரினாவில் கடந்த 3 நாட்களாக நடைபெறும் போராட்டத்தில் திரையுலக பிரமுகர்களும் கலந்து கொண்டு வருகிறார்கள். நேற்று நடிகர்கள் ராகவா லாரன்ஸ், மன்சூர் அலி கான் ஆகியோர் வந்திருந்தனர். இன்றும் அவர்கள் போராட்டத்தில் பங்கேற்றனர்.
இந்த நிலையில் நடிகர் கார்த்தி ஜல்லிக்கட்டுக்கு ஆதரவு தெரிவிக்கும் வகையில் மெரினாவில் நடக்கும் போராட்டத்தில் இன்று பங்கேற்றார். நடிகர் உதயா, டைரக்டர் கவுதமன் ஆகியோரும் ஜல்லிக்கட்டு ஆதரவு போராட்டத்தில் கலந்து கொண்டனர்.
நடிகர் கார்த்தி வந்த போது போராட்டத்தில் பங்கேற்ற இளைஞர்கள் சிலர் கை தட்டியும், கூச்சலிட்டும் ஆரவாரம் செய்தனர். இதற்கு போராட்டத்தில் ஈடுபட்ட மற்ற இளைஞர்கள் எதிர்ப்பு தெரிவித்தனர். போராட்டத்தில் கலந்து கொள்ள வருவது யாராக இருந்தாலும் சரி இது போன்ற செயல்களில் ஈடுபடாதீர்கள் என்று கேட்டுக் கொண்டனர். அதன் பின்னரே அங்கு அமைதி நிலவியது.
பின்னர் பகல் 11.45 மணியளவில் சத்யராஜ் அங்கு வந்து மாணவர்கள் போராட்டத்தில் பங்கேற்றார்.
பின்னர் சத்யராஜ் நிருபர் களிடம் கூறியதாவது:-
தலைமை தாங்குவதற்கு எந்தவித அமைப்போ தலைவர்களோ இல்லாமல் சமூக ஊடகங்கள் வாயிலாக மாணவர்கள் திரண்டது பிரமிக்க வைக்கிறது. அவர்களின் இந்த போராட்டம் நிச்சயம் வெற்றி அடையும்.
இவ்வாறு அவர் கூறினார்.
