20 ஓவர் உலக கோப்பை கிரிக்கெட்டில் மிக முக்கியமான ஆட்டத்தில் இந்தியா- நியூசிலாந்து அணிகள் இன்று கோதாவில் குதிக்கின்றன.
7-வது 20 ஓவர் உலக கோப்பை கிரிக்கெட் போட்டி ஐக்கிய அரபு அமீரகத்தில் உள்ள துபாய், அபுதாபி, சார்ஜா ஆகிய நகரங்களில் நடந்து வருகிறது. இதில் சூப்பர்-12 சுற்றில் பங்கேற்றுள்ள 12 அணிகள் இரு பிரிவாக பிரிக்கப்பட்டு தங்களுக்குள் தலா ஒரு முறை மோதுகின்றன. லீக் முடிவில் இரு பிரிவிலும் டாப்-2 இடங்களை பிடிக்கும் அணிகள் அரைஇறுதிக்குள் நுழையும்.
இதில் குரூப் 2-ல் இடம் பெற்றுள்ள முன்னாள் சாம்பியனான இந்திய அணி தனது தொடக்க ஆட்டத்தில் 10 விக்கெட் வித்தியாசத்தில் பாகிஸ்தானிடம் படுதோல்வி அடைந்தது. இந்த நிலையில் இந்திய அணி தனது 2-வது லீக்கில் நியூசிலாந்துடன் இன்றிரவு (ஞாயிற்றுக்கிழமை) துபாயில் மோதுகிறது. நியூசிலாந்தும் தனது முதல் ஆட்டத்தில் பாகிஸ்தானிடம் தோற்று இருந்தது.
இரு அணிக்குமே இது வாழ்வா-சாவா மோதல் ஆகும். அதாவது இந்த பிரிவில் பாகிஸ்தான் அணி 3 வெற்றிகளுடன் கம்பீரமாக (6 புள்ளி) முதலிடம் வகிக்கிறது. அந்த அணி எஞ்சிய இரு லீக்கில் குட்டி அணிகளான ஸ்காட்லாந்து, நமிபியாவை சந்திக்க உள்ளது. அதனால் பாகிஸ்தான் அரைஇறுதி சுற்றை எட்டுவது ஏறக்குறைய உறுதியாகி விட்டது.
மற்றொரு அரைஇறுதி வாய்ப்பில் நீடிப்பது யார்? என்பதை தீர்மானிக்கும் வகையில் இன்றைய ஆட்டம் அமைந்துள்ளது. இதில் வெற்றி பெறும் அணிக்குத் தான் அடுத்த சுற்று வாய்ப்பு பிரகாசமாகும். ஏனெனில் இதன் பிறகு மீதமுள்ள 3 ஆட்டங்களில் பலம் குறைந்த ஆப்கானிஸ்தான், ஸ்காட்லாந்து, நமிபியா ஆகிய அணிகளைத் தான் இந்தியா, நியூசிலாந்து அணிகள் எதிர்கொள்ள வேண்டி உள்ளது. இந்த ஆட்டங்களில் இரு அணிகளுமே வெற்றி பெற்று விடும் என்று எதிர்பார்க்கப்படுகிறது. அதனால் இன்றைய ஆட்டத்தில் இரு அணி வீரர்களுமே முழுமூச்சுடன் வரிந்துகட்டுவார்கள் என்று நம்பலாம்.
பாகிஸ்தானுக்கு எதிரான தொடக்க ஆட்டத்தில் இந்திய அணியில் தொடக்க ஆட்டக்காரர்கள் லோகேஷ் ராகுல் (3 ரன்), ரோகித் சர்மாவின் (0) மோசமான பேட்டிங் பின்னடைவை ஏற்படுத்தியது. கேப்டன் விராட் கோலி (57 ரன்), ரிஷாப் பண்ட் (39 ரன்) தவிர மற்ற பேட்ஸ்மேன்கள் ஜொலிக்கவில்லை. இந்தியா எடுத்த 151 ரன்கள் ஓரளவு நல்ல ஸ்கோர் என்று பார்த்தால் பாகிஸ்தான் தொடக்க ஆட்டக்காரர்கள் பாபர் அசாம், முகமது ரிஸ்வான் இருவரும் இணைந்தே இந்த இலக்கை எட்டிப்பிடித்து விட்டனர். பந்து வீச்சும் இந்தியாவுக்கு சொதப்பியது.
இதனால் இந்திய அணியில் மாற்றங்கள் செய்ய வேண்டும் என்று முன்னாள் வீரர்கள் குரல் கொடுத்தாலும், கேப்டன் விராட் கோலி அணியில் மாற்றம் செய்யமாட்டார் என்றே தெரிகிறது. ஆல்-ரவுண்டர் ஹர்திக் பாண்ட்யா வலை பயிற்சியின் போது பந்துவீச தொடங்கியுள்ளார். அவர் போட்டியில் ஓரிரு ஓவர்கள் பந்து வீசினால் நெருக்கடி குறையும். எல்லாவற்றுக்கும் மேலாக பேட்டிங்கில் தொடக்க ஆட்டக்காரர்கள் சிறப்பான தொடக்கம் தர வேண்டியது அவசியமாகும்.
நியூசிலாந்து அணி, பாகிஸ்தானுக்கு எதிரான ஆட்டத்தில் 134 ரன் மட்டுமே எடுத்த போதிலும், பந்து வீச்சில் மிரட்டியது. 19 ஓவர் வரை போராடித் தான் பாகிஸ்தான் இலக்கை அடைய முடிந்தது. டிரென்ட் பவுல்ட், டிம் சவுதி, சோதி என்று நியூசிலாந்து அணி பந்து வீச்சில் வலுவாக தென்படுகிறது. பேட்டிங்கில் கப்தில், கேப்டன் வில்லியம்சன், டிவான் கான்வே உள்ளிட்டோர் நல்ல நிலையில் உள்ளனர். அதனால் களத்தில் அனல் பறக்கும் என்பதில் சந்தேகமில்லை.
நியூசிலாந்து இடக்கை வேகப்பந்து வீச்சாளர் டிரென்ட் பவுல்ட் நேற்று கூறுகையில், ‘இந்தியாவுக்கு எதிரான ஆட்டத்தில் பாகிஸ்தான் இடக்கை வேகப்பந்து வீச்சாளர் ஷகீன் ஷா அப்ரிடியின் பந்து வீச்சு வியப்புக்குரிய வகையில் (இந்திய தொடக்க ஆட்டக்காரர்கள் இருவரின் விக்கெட்டையும் வீழ்த்தினார்) இருந்தது. அன்றைய இரவில் அவர் சாதித்தது போன்று நாளைய இரவில் (அதாவது இன்று) என்னாலும் செய்ய முடியும் என்று நம்புகிறேன். இந்திய அணியில் தரமான பேட்ஸ்மேன்கள் உள்ளனர். எனவே தொடக்கத்திலேயே அவர்களது விக்கெட்டை காலி செய்வதில் கவனம் செலுத்துவேன்’ என்றார்.
இங்கு இரவில் பனிப்பொழிவு பந்து வீச்சுக்கு கடும் சவாலாக உள்ளதால் ‘டாஸ்’ வெல்லும் அணி 2-வது பேட்டிங்கையே விரும்பும். அதனால் டாஸ் முக்கிய பங்கு வகிக்கும்.
சர்வதேச 20 ஓவர் கிரிக்கெட்டில் இவ்விரு அணிகளும் இதுவரை 16 ஆட்டங்களில் நேருக்கு நேர் மோதியுள்ளன. இதில் 6-ல் இந்தியாவும், 8-ல் நியூசிலாந்தும் வெற்றி கண்டன. 2 ஆட்டம் ‘டை’யில் முடிந்து ‘சூப்பர் ஓவர்’ கடைபிடிக்கப்பட்ட அவ்விரு ஆட்டங்களிலும் இந்தியாவே வெற்றி பெற்றது. கடந்த ஆண்டு தொடக்கத்தில் நியூசிலாந்தை அவர்களது இடத்திலேயே ஐந்து 20 ஓவர் போட்டிகளிலும் இந்தியா போட்டுத்தாக்கியது நினைவு கூரத்தக்க அம்சமாகும்.
ஆனால் 20 ஓவர் உலக கோப்பை தொடரில் இந்திய அணி நியூசிலாந்துக்கு எதிராக மோதியுள்ள இரண்டு ஆட்டங்களிலும் தோல்வியே சந்தித்துள்ளது குறிப்பிடத்தக்கது.
போட்டிக்கான இரு அணிகளின் உத்தேச பட்டியல் வருமாறு:-
இந்தியா: லோகேஷ் ராகுல், ரோகித் சர்மா, விராட் கோலி (கேப்டன்), சூர்யகுமார் யாதவ், ரிஷாப் பண்ட், ரவீந்திர ஜடேஜா, ஹர்திக் பாண்ட்யா, புவனேஷ்வர்குமார் அல்லது ஷர்துல் தாக்குர், முகமது ஷமி, பும்ரா, வருண் சக்ரவர்த்தி.
நியூசிலாந்து: மார்ட்டின் கப்தில், டேரில் மிட்செல், கேன் வில்லியம்சன் (கேப்டன்), ஜேம்ஸ் நீஷம், டிவான் கான்வே, கிளைன் பிலிப்ஸ், டிம் செய்பெர்ட், மிட்செல் சான்ட்னெர், சோதி, டிம் சவுதி அல்லது ஆடம் மில்னே, டிரென்ட் பவுல்ட்.
இந்திய நேரப்படி இரவு 7.30 மணிக்கு தொடங்கும் இந்த போட்டியை ஸ்டார் ஸ்போர்ட்ஸ் சேனல்கள் நேரடி ஒளிபரப்பு செய்கின்றன.
முன்னதாக மாலை 3.30 மணிக்கு அபுதாபியில் நடக்கும் மற்றொரு ஆட்டத்தில் ஆப்கானிஸ்தான் அணி, நமிபியாவை எதிர்கொள்கிறது. இரு அணிகளும் தங்களது 2-வது வெற்றியை குறிவைத்து களம் காணுகின்றன.
