ஆஸ்திரேலியா-இலங்கை அணிகள் இடையேயான டி20 தொடர் இன்று தொடங்குகிறது. ஆஸ்திரேலியாவில் சுற்றுப்பயணம் மேற்கொண்டுள்ள தசுன் ஷனகா தலைமையிலான இலங்கை கிரிக்கெட் அணி 5 போட்டிகள் கொண்ட 20 ஓவர் தொடரில் விளையாடுகிறது. இதில் முதல் டி20 போட்டி சிட்னி மைதானத்தில் இந்திய நேரப்படி பிற்பகல் 1.30 மணிக்கு தொடங்கி நடைபெற உள்ளது.
கடந்த ஆண்டு நவம்பர் மாதம் நடந்த 20 ஓவர் உலக கோப்பை போட்டியில் சாம்பியன் கோப்பை வென்ற ஆரோன் பிஞ்ச் தலைமையிலான ஆஸ்திரேலிய அணி அதன்பின் ஆடும் முதல் டி20 தொடர் என்பதால் இதற்கு பெரும் எதிர்பார்ப்பு எழுந்துள்ளது.
இந்த போட்டியில் ஆஸ்திரேலிய அணியில் டேவிட் வார்னர், மிட்செல் மார்ஷ் ஆகியோருக்கு ஓய்வு அளிக்கப்பட்டு அவர்களுக்கு பதிலாக பென் மெக்டெர்மோட் தொடக்க வீரராகவும், அறிமுக வீரராக இடம் பிடித்துள்ள ஜோஷ் இங்லிஸ் 3வது வரிசையிலும் விளையாடுவார்கள் என்றும் அறிவிக்கப்பட்டுள்ளது.
அதேசமயம் இலங்கை அணியை பொறுத்தமட்டில் ஆஸ்திரேலிய மண்ணில் 20 ஓவர் போட்டியில் வெகுவாக ஆதிக்கம் செலுத்தி உள்ளது. இங்கு 9 ஆட்டங்களில் 5 ஆட்டங்களில் இலங்கை வெற்றி பெற்றுள்ளது. ஒட்டுமொத்தமாக இவ்விரு அணிகளும் 17 முறை நேருக்கு நேர் மோதி இருக்கின்றன. இதில் ஆஸ்திரேலியா 9 ஆட்டத்திலும், இலங்கை 8 ஆட்டத்திலும் வெற்றி பெற்று இருப்பது குறிப்பிடத்தக்கது.
