சிவகார்த்திகேயன் ரெமோ படத்தை அடுத்து ‘தனி ஒருவன்’ ராஜா இயக்கத்தில் ஒரு படத்தில் நடித்து வருகிறார். இதில் சிவகார்த்திகேயன் ஜோடியாக நயன்தாரா நடிக்கிறார். இவர்களோடு பிரபல மலையாள நடிகர் ஃபஹத் ஃபாசில், சினேகா, ஆர்.ஜே.பாலாஜி, சதீஷ், பிரகாஷ் ராஜ் என ஒரு நட்சத்திர பட்டாளமே இப்படத்தில் இணைந்து நடித்து வருகிறது.
இப்படத்தில் சிவகார்த்திகேயன் சேரியை சேர்ந்த பையனாக நடித்து வருகிறாராம். மேலும் உணவில் இருக்கும் கலப்படம் பற்றிய பிரச்சனையை மையம்கொண்டு இப்படம் உருவாகிறதாம். இந்நிலையில் இப்படத்துக்கு வேலைக்காரன் என டைட்டில் வைத்திருப்பதாக தகவல் கசிந்துள்ளது. இதே பெயரில் ரஜினிகாந்த் நடிப்பில் 80-களில் ஒரு படம் வெளியானது குறிப்பிடத்தக்கது.
எதிர்நீச்சல் படத்திலிருந்து சிவகார்த்திகேயன் நடித்த எல்லா படங்களின் டைட்டிலும் ஒன்று பழைய பட டைட்டிலாக இருக்கும் அல்லது ஏற்கனவே ஒரு படத்தில் பிரபலமான வசனமோ அல்லது கதாபாத்திரத்தின் பெயரிலோ இருக்கும். அந்த சென்டிமென்ட் தற்போதும் தொடர்கிறது.
