கொழும்பு கோட்டையில் இருந்து வெள்ளவத்தை வரையிலான ரயில் சேவைகள் நேற்று முதல் ரத்துச் செய்யப்பட்டுள்ளன.
தெஹிவளைக்கும் வெள்ளவத்தைக்கும் இடையிலான ரயில் பாதை இன்று தொடக்கம் எதிர்வரும் திங்கட்கிழமை அதிகாலை 4.00 மணி வரை மூடப்பட்டிருக்கும்.
இதன் காரணமாக இன்று தொடக்கம் ஞாயிறு வரை கொழும்பு கோட்டையில் இருந்து வெள்ளவத்தை வரையிலான சகல ரயில் சேவைகளும் ரத்துச் செய்யப்பட்டுள்ளதாக ரயில்வே திணைக்களம் அறிவித்துள்ளது.
இன்று தொடக்கம் ஞாயிறு வரை கல்கிசை, மாத்தறை ரயில் நிலையங்களில் இருந்து பயணத்தைத் தொடங்கி யாழ்ப்பாணம், காங்கேசன்துறை வரை பயணிக்கும் ரயில் வண்டியும், மாத்தறையிலிருந்து வவுனியா, கண்டி ஆகிய நகரங்கள் நோக்கி பயணிக்கும் ரயில் வண்டிகளும், கொழும்பு கோட்டையிலிருந்து பயணத்தைத் தொடங்க உள்ளன. இந்நகரங்களில் இருந்து திரும்பி வரும் ரயில் வண்டிகள் கோட்டையில் பயணத்தை பூர்த்தி செய்யும்.
தெற்கு கரையோர ரயில் பாதையில் தெஹிவளை, வெள்ளவத்தை ரயில் நிலையங்களுக்கு இடையில் அமைந்துள்ள பழைய பாலத்திற்குப் பதிலாக புதிய பாலத்தைப் பொருத்தும் நோக்கில் இந்த நடவடிக்கை எடுக்கப்படுகிறது.
