காங்கேசன்துறை கடல் எல்லையில் வைத்து இந்திய கடற்றொழிலாளர்கள் மீது இலங்கை கடல் கொள்ளையர்களால் மேற்கொள்ளப்பட்ட மிலேச்சத்தனமான தாக்குதலை வடமாகாண கடற்றொழிலாளர்கள் சார்பில் கண்டிப்பதாக அகில இலங்கை தொழிலாளர் சமூகங்களின் கூட்டமைப்பின் தேசிய அமைப்பாளர் என்.வி.சுப்பிரமணியம் தெரிவித்துள்ளார்.
அவரது இல்லத்தில் நேற்று(22.08.2023) இடம்பெற்ற ஊடகவியலாளர் சந்திப்பின் போதே அவர் இவ்வாறு தெரிவித்துள்ளார்.
கொடூரமான முறையில் தாக்குதல்
அவர் மேலும் தெரிவிக்கையில்,“இலங்கை காங்கேசன்துறை கடல் எல்லையில் வைத்து இந்திய நாட்டு படகு கடற்றொழிலாளர்கள் மிகவும் கொடூரமான முறையில் தாக்குதலுக்கு உள்ளாகியுள்ளனர்.
எமது வடபகுதி கடற்றொழிலாளர்கள் இந்தியா ரோலர் மீன்பிடி படகுகளால் தொடர்ச்சியாக பாதிக்கப்பட்டுவரும் நிலையில் இரு நாட்டு கடற்றொழிலாளர்களுக்கும் இடையில் இடம்பெற்ற பேச்சுவார்த்தைகளின் பின்னர் இந்திய கடற்றொழிலாளர்களின் வருகை சற்று குறைந்துள்ளது.
இவ்வாறான ஒரு நிலையில் எமது கடற்றொழிலாளர்களையும் இந்திய கடற்றொழிலாளர்களையும் தூண்டிவிடும் நோக்கில் இந்திய கடற்றொழிலாளர்கள் மீது தாக்குதல் நடத்தப்பட்டதா என்ற சந்தேகம் எழுகிறது.
கடற்றொழிலையே வாழ்வாதாரமாக நம்பி இருக்கும் இந்தியா கடற்றொழிலாளர்கள் மீது தாக்குதல் நடத்தப்பட்டு அவர்களின் பல இலட்சம் பெறுமதியான கடற்றொழில் உபகரணங்களும் சூறையாடப்பட்டுள்ளது.
ஆகவே தாக்குதலுக்கு உள்ளான கடற்றொழிலாளர்கள் உடல்நலம் தேர்ச்சி பெறுவதுடன் குறித்த தாக்குதலை வடமாகாண கடற்றொழிலாளர்கள் சார்பில் கண்டிக்கிறோம் என அவர் மேலும் தெரிவித்தார்.
தலைவர் அன்னலிங்கம் அன்னராசா கருத்து
இதேவேளை இலங்கை கடற்பரப்பிலேயே சகோதர கடற்றொழிலாளர்கள் தாக்கப்பட்டமை கவலை அளிக்கின்ற ஒரு விடயமாக இருக்கின்றது என ஊர்காவற்துறை கடத்தொழிலாளர் சமாசங்களின் தலைவர் அன்னலிங்கம் அன்னராசா தெரிவித்துள்ளார்.
குறித்த ஊடக சந்திப்பில் கலந்துகொண்டு கடற்றொழிலாளர்கள் தாக்கப்பட்டமை தொடர்பில் கருத்து தெரிவிக்கும் போதே இவ்வாறு கூறினார்.
அங்கு அவர் மேலும் தெரிவிக்கையில், வடக்கு மாகாண மக்கள் அல்லது வடமாகண கடற்றொழிலாளர்கள் இந்திய கடற்றொழிலாளர்களின் விடயத்தில் வன்முறையை விரும்பியதும் இல்லை, வன்முறையை நோக்கி பயணிப்பதும் இல்லை.
இந்த கடற்றொழிலாளர்களுடைய பிரச்சினை தீர்க்கப்பட வேண்டும் என்பதற்காக நாங்கள் எப்பொழுது அறவழியிலும், ஜனநாயக வழியிலும் தொடர்ந்து குரல் கொடுத்து வருகின்றோம்.
கடந்த காலத்தில் இதுபோன்ற செயல்கள் வடக்கில் ஊக்குவிக்கப்படுகின்ற சந்தர்ப்பங்கள் இருந்த போதும் கூட நாங்கள் எங்களது கடற்றொழிலாளர்களை வன்முறைக்கோ அல்லது யுத்தத்திற்கும் நாங்கள் செல்லவிடாது தடுத்தோம்.
ஏனென்றால் இது ஜனநாயக ரீதியில் செய்யப்பட வேண்டிய ஒரு விடயம். எங்களை பொறுத்தவரையில் காரைக்கால் கடற்றொழிலாளர்கள் தாக்கப்பட்டமை கவலையளிக்கின்ற ஒரு விடயம்.
அதேவேளை இலங்கை அல்லது இந்தியகடற்றொழிலாளர்களாக இருந்தாலும் கடற்பரப்பில் இவ்வாறான சம்பவங்கள் நடப்பதை நாங்கள் விரும்பவில்லை, ஏற்றுக்கொள்ளவும் இல்லை.
இதுபோன்ற சம்பவங்கள் இனியும் நடக்காமல் இருக்க வேண்டும். அவர்கள் தங்களது வாழ்வாதாரத்துக்காக நாட்டு படகிலே வந்து மீன்பிடிக்கின்றார்கள். இது குறித்து நாங்கள் இன்றையதினம் வடக்கு மாகாண கடற்றொழிலாளர்களின் சங்கங்கள், சமாசங்கள் ஆகியவற்றை விசாரித்த வகையில், என்றைக்குமே நாங்கள் இவ்வாறான சம்பவங்களை செய்ய விரும்பவில்லை, செய்ததும் இல்லை.
இதற்கும் வடக்கு கடற்றொழிலாளர்களுக்கும் எந்த சம்பந்தமும் இல்லை என்ற செய்தியை எமக்கு தெரிவித்திருந்தார்கள். எனவே இவ்வாறான சம்பவங்கள் இனிமேல் எப்போதும் இடம்பெறக்கூடாது என அவர் மேலும் தெரிவித்தார்.
