அதிபர் தேர்தலில் போட்டியிடுவேன் என எதிர்க்கட்சித் தலைவர் சஜித் பிரேமதாச தெரிவித்துள்ளார்.
நேற்று(3)இடம்பெற்ற கிரிந்திஓய வேலைத்திட்டத்தின் தெற்கு கால்வாயை புனரமைக்கும் நிகழ்வில் உரையாற்றும் போது இவ்வாறு கூறியுள்ளார்.
“அரசாங்கப் பிரதிநிதிகளின் குழு ஒன்று கோயபல்ஸின் ஊடகக் கொள்கையை முன்வைத்து ரணில் அதிபர் தேர்தலில் போட்டியிட்டால் சஜித் போட்டியிட மாட்டார் என்ற போலிச் செய்தியை கட்டமைத்து வருகின்றனர்.
நான் கோழை அல்ல
நான் அதிபர் தேர்தலில் போட்டியிட்ட போது கோட்டபாயவுடன் உடன்படிக்கை செய்து கொண்டு தன்னை தோற்கடிக்க முயற்சித்தவர்களே இவ்வாறான அறிக்கைகளை கூறிவருகின்றனர்.
எதிர்க்கட்சித் தலைவராக அதிபர் தேர்தலில் போட்டியிடுவேன் என்பதே இவர்களுக்குக் கூறக்கூடிய பதில். நான் மரணத்திற்கு பயப்படும் கோழை அல்ல. எந்த ஒரு சவாலையும் சந்திக்கத் தயாராக உள்ளேன்.
ராஜபக்சர்களுடன் நான் ஒருபோதும் ஒப்பந்தங்கள் மற்றும் உடன்படிக்கைகளை மேற்கொள்ளவில்லை” என்றார்.
