மன்னாரில் வாக்காளர்களுக்கு வழங்குவதற்காக அரசியல் கட்சி ஒன்றினால் கொண்டு வரப்பட்ட ஒரு தொகுதி உலர் உணவு பொருட்கள் பொலிஸாரால் மீட்கப்பட்டுள்ளது.
இன்று (13-11-2024) மாலை மன்னார் – யாழ் பிரதான வீதியில் அடம்பன் பொலிஸாரினால் வாகனம் ஒன்றில் இருந்த குறித்த உலர் உணவு பொருட்கள் மீட்கப்பட்டுள்ளதோடு 3 சந்தேக நபர்களும் கைது செய்யப்பட்டுள்ளதாக தெரிவித்தனர்.
சம்பவம் தொடர்பில் மேலும் தெரியவருவதாவது,
பொலிஸாருக்கு கிடைக்கப்பெற்ற தகவலின் அடிப்படையில் மன்னார் – யாழ் பிரதான வீதியில் வைத்து வாகனம் ஒன்றை சோதனை செய்த போது குறித்த வாகனத்தில் ஒரு தொகுதி உலர் உணவு பொருட்கள் காணப்பட்டது.
இதன் போது பொலிஸார் முன்னெடுத்த விசாரணைகளின் போது குறித்த உலர் உணவு பொருட்கள் அரசியல் கட்சி ஒன்றினால் வாக்காளர்களுக்கு வழங்க கொண்டு வரப்பட்டமை தெரியவந்தது.
இந்த நிலையில் குறித்த பொருட்களை பொலிஸார் அடம்பன் பொலிஸ் நிலையத்திற்கு கொண்டு சென்றதோடு, வாகனத்தின் சாரதி, உதவியாளர் உட்பட மூவர் கைது செய்யப்பட்டனர்.
இதேவேளை, குறித்த வாகனத்தில் சுமார் 290 நபர்களுக்கு வழங்கக்கூடிய வகையில் தயார் செய்யப்பட்ட 5 கிலோ அரிசி பொதி, 2 கிலோ மா,1 கிலோ சீனி, 20 கிராம் ரிங்சோ பக்கட் கொண்டு வரப்பட்ட நிலையில் பொலிஸாரினால் மீட்கப்பட்டுள்ளது.
குறித்த பொருட்கள் 6 லட்சத்து 13 ஆயிரத்து 500 ரூபாவுக்கு கொள்வனவு செய்யப்பட்டமை தெரியவந்துள்ளது.
