திருமணமாகாத இளைஞர்களுக்கு சீன நிறுவனம் ஒன்று கடுமையான விதியை விதித்தது சர்ச்சையை கிளப்பியுள்ளது.
சீன நிறுவனத்தின் சர்ச்சை கொள்கை
சீனாவில் உள்ள ஒரு நிறுவனம், நிர்ணயிக்கப்பட்ட திகதிக்குள் திருமணம் செய்யாத ஊழியர்களை பணிநீக்கம் செய்யும் சர்ச்சைக்குரிய கொள்கையை அறிமுகப்படுத்தியுள்ளது.
இது பொதுமக்களின் கடும் எதிர்ப்பையும், அதிகாரிகளின் தலையீட்டையும் தொடர்ந்து, சம்பந்தப்பட்ட நிறுவனம் கொள்கையை திரும்பப் பெற்றுள்ளது.
ஷான்டாங் மாகாணத்தில் அமைந்துள்ள ஷுன்டியன் கெமிக்கல் குழுமம், இந்த ஆண்டு தொடக்கத்தில், தங்கள் ஊழியர்களின் திருமண விகிதத்தை செயற்கையாக அதிகரிக்க ஒரு உத்தரவை அமல்படுத்தியது.
28 முதல் 58 வயது வரையிலான திருமணமாகாத மற்றும் விவாகரத்து பெற்ற ஊழியர்களை இலக்காகக் கொண்ட இந்த கொள்கை, செப்டம்பர் மாத இறுதிக்குள் அவர்கள் “திருமணம் செய்து குடும்பமாக குடியேற வேண்டும்” என்று உத்தரவிட்டது.
விதிகளின் முக்கிய படிகள்
மார்ச் மாதத்திற்குள் திருமணத்தை நோக்கி முன்னேற்றம் காட்டத் தவறிய ஊழியர்கள் சுய-விமர்சன கடிதங்களை சமர்ப்பிக்க வேண்டும்.
ஜூன் மாதத்திற்குள் திருமணம் செய்யாதவர்கள் செயல்திறன் மதிப்பீடுகளை எதிர்கொள்ள வேண்டும்.
இறுதியாக, செப்டம்பர் மாத இறுதிக்குள் திருமணமாகாதவர்கள் பணி நீக்கம் செய்யப்படுவார்கள் என தெரிவித்துள்ளது.
ஷுன்டியன் கெமிக்கல் குழுமம், பாரம்பரிய சீன மதிப்புகளான விசுவாசம் மற்றும் பெற்றோருக்கு மரியாதை ஆகியவற்றை மேற்கோள் காட்டி தங்கள் நிலைப்பாட்டை நியாயப்படுத்த முயன்றது.
ஆனால் இந்த கொள்கை ஆன்லைனில் கடும் விமர்சனத்தை தூண்டியது, பல பயனர்கள் ஊழியர்களின் தனிப்பட்ட வாழ்க்கையில் நிறுவனம் தலையிடுவதை கண்டித்தனர்.
சீனாவில் குறையும் திருமணங்கள்
சீனாவில் கடந்த ஆண்டு, திருமணங்களின் எண்ணிக்கை 6.1 மில்லியனாக குறைந்தது, இது முந்தைய ஆண்டின் 7.68 மில்லியனிலிருந்து கணிசமான குறைவாகும்.
குறைந்து வரும் திருமண விகிதங்களை எதிர்த்துப் போராடும் முயற்சியில், சில உள்ளூர் அரசாங்கங்கள் ஊக்கத்தொகைகளை அறிமுகப்படுத்தி இருப்பது குறிப்பிடத்தக்கது.
