ஆசிரியர் ஆட்சேர்ப்புகளின் போது, நுண்கலைத்துறையையும் இணைத்து விண்ணப்பங்கள் கோருவதற்கும், அதனூடாக இவர்களுக்கு உரிய தொழில்வாய்ப்புகளை வழங்குவதற்கும் நடவடிக்கை எடுக்க வேண்டுமென நாடாளுமன்ற உறுப்பினர் டக்ளஸ் தேவானந்தா, கல்வி அமைச்சர் அகிலவிராஜ் காரியவசத்திடம் கோரிக்கை விடுத்துள்ளார்.
நாடாளுமன்றில் இன்று கருத்து தெரிவிக்கையிலேயே அவர் இவ்வாறு கூறியுள்ளார்.
இது தொடர்பில் தொடர்ந்தும் தெரிவிக்கையில்,
தமிழ் மக்களின் அருகி வருகின்ற பாரம்பரிய நுண்கலைத் துறையை உயிர்ப்பித்தல், அவற்றைப் பேணிப்பாதுகாத்து, வளர்த்தல் போன்ற நோக்கங்களை அடிப்படையாகக் கொண்டு, கிழக்குப் பல்கலைக்கழகத்தின் சுவாமி விபுலானந்த அழகியல் கற்கைகள் நிறுவகம் 2005 ஆம் ஆண்டு ஆரம்பிக்கப்பட்டது.
அன்று முதல் இன்று வரையில் இந்த நிறுவகத்தில் பட்டப்படிப்பினை பூர்த்தி செய்துள்ள எந்தவொரு பட்டதாரிகளும் தங்களுக்குரிய தொழில்வாய்ப்புகளைப் பெறாத நிலையே காணப்படுகின்றதாகவும், அந்த வகையில் சுமார் 650 பட்டதாரிகள் இந்த துறை சார்ந்த வேலைவாய்ப்புகளை எதிர்நோக்கியிருக்கின்றனர் என்றும் தெரிய வருகிறது.
இவ்வாறானதொரு நிலையில், 5 வருட கற்கை நெறியினைப் பூர்த்தி செய்துள்ள மேற்படிப் பட்டதாரிகள் விரக்தி நிலை அடைந்து தற்போது சத்தியாக்கிரகப் போராட்டத்தில் ஈடுபட்டு வரும் நிலை உருவாகியுள்ளதுடன், மேற்படித் துறை சார்ந்து ஏனைய மாணவர்களது நாட்டமும் குறைந்துள்ளது.
எனவே, மேற்படி பட்டதாரிகளையும் ஆசிரியர்களுக்கான நியமனங்களின் போது இணைத்துக் கொள்வதற்கு நடவடிக்கை எடுக்கப்பட வேண்டுமென வலியுறுத்தியுள்ளமை குறிப்பிடத்தக்கது.
