வெட்டப்பட்ட நிலையில் உயிருக்கு போராடிக் கொண்டிருந்த ஒருவர் மீட்கப்பட்டு, சிலாபம் வைத்தியசாலையில் அனுமதிக்கப்பட்ட நிலையில் உயிரிழந்துள்ளதாக பல்லம பொலிஸார் குறிப்பிட்டுள்ளனர். இவரின் வயது 29 எனவும் தெரியவருகின்றது.
பல்லம பொலிஸ் பிரிவிலுள்ள மயானத்திற்கு அருகில் இருந்த பாழடைந்த இடம் ஒன்றிலேயே இவர் நேற்று இரவு வெட்டப்பட்ட நிலையில் விட்டுச் செல்லப்பட்டுள்ளதாக, தெரியவருகின்றது.
உயிருக்கு போராடிக்கொண்டிருந்த இவ்விளைஞனை கண்ட பிரதேச மக்கள் பொலிஸாருக்கு இது பற்றி தெரியப்படுத்தியுள்ளனர்.
இதனையடுத்து, சிலாபம் வைத்தியசாலையில் அனுமதிக்கப்பட்ட அவர், இன்று அதிகாலை 02.00 மணியளவில் மரணமடைந்துள்ளதாக தெரியவந்துள்ளது.
உயிரிழந்த நபர் கடந்த 23ம் திகதி சிலருடன் மோதலில் ஈடுபட்டுள்ளதாகவும், குறித்த பிரச்சினை இந்தக் கொலைக்கு காரணமாக இருக்கலாமா என்ற கோணத்திலும் விசாரணைகள் மேற்கொள்ளப்பட்டு வருவதாகவும் பல்லம பொலிஸார் சுட்டிக்காட்டியுள்ளார்.
