ஊர்காவற்துறை மெலிஞ்முனை பகுதியில் கடந்த இரண்டு நாட்களில் பெண் ஒருவர் உள்ளிட்ட 17 பேர் கைது செய்யப்பட்டுள்ளதாக தெரிவிக்கப்பட்டுள்ளது.
அண்மையில் குறித்த பகுதியில் இடம்பெற்ற வாகன விபத்தில் 16 வயதான பாடசாலை மாணவர் ஒருவர் உயிரிழந்திருந்தார். இந்த சம்பவத்தையடுத்து அந்த பகுதியில் பதற்ற நிலை ஏற்பட்டிருந்தது.
இதனையடுத்து, பேருந்து ஒன்றை அந்த பகுதி மக்கள் அடித்து நொருக்கியிருந்தனர். மேலும், கல்வீச்சு தாக்குதல்களிலும் ஈடுபட்டிருந்தனர்.
குறித்த விடயம் ஊர்காவற்துறை நீதவான் நீதிமன்ற நீதிபதி ஏ.எம்.எம்.ரியாழின் கவனத்திற்கு கொண்டு வரப்பட்டது. இந்நிலையில், வன்முறையை தூண்டும் வகையில் செயற்பட்டவர்களை கைது செய்யுமாறு நீதிபதி உத்தரவிட்டிருந்தார்.
இதனையடுத்து நேற்று முன்தினம் இரவு முதல் தேடுதல் நடவடிக்கையில் ஈடுபட்டிருந்த பொலிஸார், இருவரை கைது செய்திருந்தனர்.
கைது செய்யப்பட்டவர்களை நீதிமன்றில் முன்னிலைப்படுத்திய போது குறித்த இருவரையும் 29ஆம் திகதி வரையில் விளக்கமறியலில் வைக்குமாறு உத்தரவிடப்பட்டுள்ளது.
இந்நிலையில், நேற்றைய தினம் பெண் ஒருவர் உள்ளிட்ட 15 பேர் கைது செய்யப்பட்டுள்ளதாகவும், குறித்த அனைவரையும் நீதிமன்றில் முன்னிலைப்படுத்த நடவடிக்கை எடுக்கப்பட்டுள்ளதாகவும் தெரிவிக்கப்பட்டுள்ளது.
