மியான்மர் நாட்டில் ராணுவ ஆட்சி முடிவுக்கு வந்து ஜனநாயக முறைப்படி கடந்த ஆண்டு நவம்பர் 8-ம் தேதி பாராளுமன்ற தேர்தல் நடந்தது. அதில் ஆங் சான் சூகியின் ஜனநாயகத்துக்கான தேசிய கட்சி (என்.எல்.டி.) இரு சபைகளிலும் 80 சதவீதத்துக்கும் அதிகமான இடங்களில் வெற்றி பெற்று ஆட்சியை கைப்பற்றியது. ஆங் சான் சூகி அரசு ஆலோசகராக இருந்து வருகிறார்.
மியான்மரின் வடக்குப் பகுதியான ரக்கினேவில் சிறுபான்மை ரோஹிங்கியா இன முஸ்லிம்கள் அதிகளவில் வாழ்ந்து வருகின்றனர். வங்காளதேசம் நாட்டில் இருந்து குடிபெயர்ந்து மியான்மரில் பத்து லட்சத்துக்கும் அதிகமான மக்கள் தொகையை கொண்டவர்களாக இருக்கும் இவர்களில் சிலர், கடந்த 2012-ம் ஆண்டில் இருந்து ஆட்சியாளர்களின் ஒடுக்குமுறைக்கு எதிராக ஆயுதம் தாங்கிய போராட்டங்களில் ஈடுபட்டு வருகின்றனர்.
ராணுவத்தினரின் தாக்குதலால் உயிருக்கு பயந்து ரோஹிங்கியா முஸ்லிம்கள் வங்காளதேசத்திற்கு தப்பிச் சென்ற வண்ணம் உள்ளனர். இரு நாடுகளுக்கும் இடையிலான ஆற்றின் வழியாக படகில் செல்லும் பலர் விபத்துகளில் சிக்கி உயிரிழந்து வருகின்றனர். மியான்மரில் உள்ள போலீஸ் சோதனைச் சாவடிகளின் மீது கடந்த ஆகஸ்ட் மாதம் 25-ம் தேதி ரோஹிங்கியா போராளிகள் தாக்குதல் நடத்தியதை தொடர்ந்து அவர்களுக்கு எதிரான ராணுவ வேட்டை தீவிரமாகி உள்ளது.
மியான்மரில் ராணுவ நடவடிக்கைகள் தொடங்கிய நாளில் இருந்து சுமார் 1.25 லட்சம் ரோஹிங்கியா முஸ்லிம்கள் அங்கிருந்து வெளியேறி அண்டை நாடான வங்காளதேசத்தில் அகதிகளாக தஞ்சம் அடைந்துள்ளனர். குறிப்பாக, நேற்று ஒரேநாளில் மட்டும் சுமார் 36 ஆயிரம் ரோஹிங்கியா முஸ்லிம்கள் வங்காளதேசத்தில் தஞ்சம் அடைந்துள்ளனர்.
இந்நிலையில், மியான்மரில் ரோஹிங்கியா முஸ்லிம்கள் மீது ராணுவம் நடத்திவரும் ஒடுக்குமுறைகளுக்கு ஐக்கிய நாடுகள் சபையின் பொதுச் செயலாளர் அன்டோனியோ குட்டெரெஸ் கண்டனம் தெரிவித்துள்ளார். அவர்களுக்கு மியான்மர் அரசு சட்ட அங்கீகாரம் வழங்க வேண்டும் எனவும் அவர் வலியுறுத்தியுள்ளார்.
மியான்மர் நாட்டின் ரகினே மாநிலத்தில் பாதுகாப்பு, மனிதநேயம், மனித உரிமைகள் சீரழிந்து வருவதாக குறிப்பிட்டுள்ள அன்டோனியோ, வறுமையின் பிடியில் சிக்கியுள்ள ரகினே மாநிலத்தில் வாழ்பவர்கள் நீண்டகாலமாகவே அநீதியான முறையில் நடத்தப்படுவதை அறிந்து வேதபை அடைவதாக குறிப்பிட்டுள்ளார்.
இவ்விவகாரம் தொடர்பாக செய்தியாளர்களுக்கு பேட்டியளித்த அன்டோனியோ குட்டெரெஸ் கூறியதாவது:-
ரோஹிங்கியா போராளிகள் சமீபத்தில் நடத்திய தாக்குதலுக்கு நான் முன்னர் கண்டனம் தெரிவித்திருந்தேன். ஆனால், தற்போது மியான்மர் நாட்டு பாதுகாப்பு படையினரால் நடத்தப்படும் பாரபட்சமான தாக்குதல் அங்கு மனிதநேயத்தையும், மனித உரிமைகளையும் மீறும் வகையிலாக அமைந்துள்ளது. இத்தகைய அணுகுமுறை மதக்கலவரத்தை மேலும் அதிகப்படுத்தும்.
இதுதொடர்பாக, உரிய நடவடிக்கைகள் எடுக்குமாறு ஐ.நா. பாதுகாப்பு சபையை வலியுறுத்தியுள்ளேன். அங்கு நிலவரம் மேலும் மோசமடைவதை தடுப்பதற்கான தீர்வை காண சர்வதேச சமுதாயம் முன்வர வேண்டும். அதேவேளையில், இந்த பிரச்சனைக்கான மூலக்காரணத்தை கண்டறிந்து உரிய நடவடிக்கை எடுக்கப்பட வேண்டும்.
ரகினே மாநில முஸ்லிம்களுக்கு குடியுரிமை அளிப்பது கடினமாக இருந்தால் தற்போதைக்கு அவர்களுக்கு சட்ட அங்கீகாரமாவது வழங்கப்பட வேண்டும். அந்த அங்கீகாரத்தின் மூலம் அவர்கள் வெளிப்பகுதிகளுக்கு சென்று கூலிவேலை செய்யவும், கல்வி மற்றும் சுகாதார வசதிகளை பெறவும் முடியும்.
ரகினே மாநிலத்தில் வாழும் முஸ்லிம்கள் தொடர்பாக ஐ.நா.சபை முன்னாள் பொதுச் செயலாளர் கோபி அன்னான் தலைமையிலான குழு அளித்த ஆய்வறிக்கையில் குறிப்பிடப்பட்டுள்ள பரிந்துரைகளை முழுமையாக அமல்படுத்த இயான்மர் அரசு முன்வர வேண்டும்.
