வடக்கு மாகாண முன்பள்ளி ஆசிரியர்களுக்கு அடுத்த ஆண்டிலிருந்து 2000 ரூபா வேதனம் அதிகரிக்கப்படும் என, மாகாண கல்வி பண்பாட்டலுவல்கள், விளையாட்டுத்துறை மற்றும் இளைஞர் விவகார அமைச்சர் கலாநிதி க.சர்வேஸ்வரன் தெரிவித்தார்.
யாழ் – ஏழாலை திவ்யா முன்பள்ளியின் வருடாந்த கலை விழாவில் பிரதம விருந்தினராக கலந்து கொண்டு உரையாற்றும் போதே க.சர்வேஸ்வரன் இவ்வாறு குறிப்பிட்டார்.
அங்கு அவர் தொடர்ந்தும் உரையாற்றுகையில்….
மாணவர்களில் முன்பள்ளி மாணவர்களுக்கு கற்பிப்பதே அதிகம் சிரமமான விடயம் எனவும் ஆனாலும் ஆசிரியர்கள் மிகக் குறைந்த வேதனத்தைப் பெற்றுக் கொண்டு பல்வேறு பொருளாதார நெருக்கடிகளுக்கு மத்தியிலும் சேவை மனப் பாண்மையோடு முன்பள்ளி சிறார்களுக்கு கற்பித்து வருவதானது போற்றுதலுக்குரியதெனவும் க.சர்வேஸ்வரன் சுட்டிக்காட்டியுள்ளார்.
முன்பள்ளி சிறார்கள் நாற்றுக்களைப் போன்றவர்கள் என குறிப்பிட்ட க.சர்வேஸ்வரன் அந்த நாற்றுக்களை பயன் தரக்கூடிய மரங்களாக உருவாக்குகின்ற உயரிய பணியில் ஈடுபட்டிருக்கும் உங்கள் ஒவ்வொருவரின் சேவையும் மகத்தானதெனவும் தெரிவித்தார்.
அத்துடன்; முன்பள்ளி ஆசிரியர்களுக்கு வடக்கு மாகாண சபையால் வழங்கப்படுகின்ற வேதனம் என்பது மிக சொற்பமானது எனவும்
அவர்களின் வாழ்க்கைக்கு தேவையான பொருளாதாரமாக அவை நிச்சயம் இருக்கமாட்டாது என்பதை நாம் அறிவதாகவும் க.சர்வேஸ்வரன் மேலும் தெரிவித்தார்.
இருப்பினும் மாகாண சபையினால் பாரியளவில் முன்பள்ளி ஆசிரியர்களுக்கான வேதனத்தை உயர்த்த முடியாத நிதி நெருக்கடியில் தற்போது வடக்கு மாகாணசபை உள்ளதாக தெரிவித்த க.சர்வேஸ்வரன்
அவர்களின் வேதனத்தை அதிகரிப்பதற்கு மத்திய அரசு மாகாணத்திற்கு பணத்தினை ஒதுக்குவதில்லை என்றும் குற்றம் சுமத்தியுள்ளார்.
இருப்பினும் குறித்த ஆசிரியர்களின் உயரிய சேவையை கருத்தில் கொண்டு அடுத்த ஆண்டு (2018) தொடக்கம் 2000 ரூபா வேதன அதிகரிப்பை மேற்கொள்ள உள்ளதாகவும் க.சர்வேஸ்வரன் குறிப்பிட்டுள்ளார்.
இதற்காக வடக்கு மாகாண சபையின் அமைச்சரவை அங்கீகாரம் வழங்கியுள்ளதாகவும் அவர் மேலும் தெரிவித்துள்ளமையும் குறிப்பிடத்தக்கது.
