உலக கிண்ண தகுதி போட்டியில் நேற்று நடைபெற்ற 9 ஆவது சூப்பர் சிக்சஸ் போட்டியில் ஆப்கானிஸ்தான் அணி வெற்றி பெற்று உலக கிண்ண போட்டிக்கு தகுதி பெற்றுள்ளது.
2019 ஆம் ஆண்டு நடைபெறவுள்ள உலக கிண்ண போட்டிக்கு தகுதி பெற்ற அணிகளை விட, ஏனைய அணிகளுக்கான தகுதி போட்டி கடந்த 4 ஆம் திகதி முதல் ஆரம்பமாகி நடைபெற்று வருகின்றது. இப் போட்டியில் நேற்று நடைபெற்ற 9 ஆவது சூப்பர் சிக்சஸ் போட்டியில் ஆப்கானிஸ்தான் மற்றும் அயர்லாந்து அணிகள் மோதியுள்ளன.
இரு அணிகளுக்கும் இடையில் நடைபெற்ற போட்டியில் முதலில் களமிறங்கிய அயர்லாந்து அணி 50 ஓவர்களில் 7 விக்கெட்டுக்களை இழந்து 209 ஓட்டங்களை பெற்றுள்ளது.
இதனை தொடர்ந்து களமிறங்கிய ஆப்கானிஸ்தான் அணி 49.1 ஓவர்களில் 5 விக்கெட்டுக்களை இழந்து 213 ஓட்டங்களை பெற்று 5 விக்கெட்டுக்களால் அயர்லாந்து அணியை வெற்றி பெற்றுள்ளது. இதனடிப்படையில் உலக கிண்ண போட்டிக்கு ஆப்கானிஸ்தான் அணி தகுதி பெற்றுள்ளதுடன், நாளை நடைபெறும் தகுதி போட்டிக்கான இறுதி போட்டியில் மேற்கிந்தியா அணியுடன் மோதவுள்ளது.
